Koronavirýstyń jańa túri COVID-19 jappai taralýyna bailanysty kóptegen memleketter Tótenshe jaǵdai rejimin engizdi. Qazaqstanmen birge, TJ rejimi Italiia, AQSh, Ispaniia, Chehiia, Estoniia, Rýmyniia, Bolgariia Slovakiia jáne Majarstanda jariialandy, dep habarlaidy QazAqparat.
«Qazaqstan tótenshe jaǵdaidy engizgen jalǵyz memleket emes. Tótenshe jaǵdai tártibi AQSh, Italiia, Bolgariia, Serbiia, Estoniia, Rýmyniia, Chehiia jáne basqa da elderde engizilgen. Birqatar memleketter virýstyń taralýy keń etek jaiyp jáne jaǵdai baqylaýdan shyǵa bastaǵan kezde ǵana tótenshe jaǵdaidy engizýge májbúr boldy. Qazaqstandyq bilik tótenshe jaǵdaidy aldyn alý sharasy retinde engizýde», - dep jazdy QR Prezidentiniń keńesshisi Erlan Karin Facebook paraqshasynda.
11 naýryzda Dúniejúzilik densaýlyq saqtaý uiymy (DDU) jańa koronavirýstyń órshýin pandemiia dep baǵalady. «COVID-19 álemniń 158 eline taraldy jáne 169 myńnan astam adamǵa juqty. Sońǵy derekter boiynsha, QHR-da 80 884 juqtyrý oqiǵasy anyqtaldy, onyń 3 199-y ólimge ákep soqty. Koronavirýstyq indettiń oshaǵy qazir – Qytai emes, Eýropa», dep jazdy DDU.
Qytaidan keiingi jappai infektsiia tirkelgen Italiiada 31 qańtarda tótenshe jaǵdai engizildi. Italiia alǵashqylardyń biri bolyp mundai rejimdi engizdi. Qazirgi ýaqytta bul elde 24 myńnan astam adam koronavirýspen aýyryp, 1809 adam qaitys boldy. Memleket basshysynyń sheshimimen rejim 6 ai boiy óz kúshinde bolady.
11 naýryz kúni Majarstan Úkimeti koronavirýske bailanysty Tótenshe jaǵdai jariialaýdy uiǵardy. Eldegi barlyq buqaralyq jáne saltanatty sharalar toqtatyldy. Bul elde 32 adam koronavirýstyń jańa túrin juqtyrdy.
Amerika Qurama Shtattarynda 14 naýryzdan bastap, koronavirýs infektsiiasynyń taralýyna bailanysty tótenshe jaǵdai jariialandy. Ol ýaqytta AQSh-ta COVID-19-ǵa shaldyǵýdyń 1700 jaǵdaiy tirkelip, 40-tan astam adam kóz jumǵan edi.
«Tótenshe jaǵdai Trampqa ulttyq apattarǵa qarsy qordan koronavirýspen kúreske 50 mlrd dollarǵa deiin bólýge, sondai-aq federaldy bilikke shtattarmen jáne jergilikti organdarmen is-qimyldardy anaǵurlym tiimdi úilestirýge múmkindik ashady», - dep jazady VVS.
Sondai-aq AQSh prezidenti koronavirýsty anyqtaityn diagnostikalyq testilerdiń qosymsha jarty million jiyntyǵy aldaǵy aptanyń basynda jáne bir ai ishinde taǵy 5 milliony dárigerlerge jetkiziletinin málim etti. Bul rette onyń pikirinshe, olardy qoldanýdyń qajeti bolmaidy.
AQSh Prezidenti málim etkendei, onyń bul jarlyǵy densaýlyq saqtaý ministriniń quzyretin keńeitedi. Budan bylai onyń qabyldaityn sharalary qoldanystaǵy keibir zańdarmen jáne erejelermen shektelmeitin bolady. Bul, densaýlyq saqtaý organdaryna anaǵurlym jedel ári ikemdi áreket etýge múmkindik beredi.
Sonymen birge, qazirgi ýaqytta Estoniiada Tótenshe jaǵdai rejimi qosyldy. El aýmaǵyna shetel azamattarynyń kelýine, barlyq qoǵamdyq sharalarǵa tyiym salynady, mektepter, ýniversitetter, kinoteatrlar, mýzeiler, teatrlar men sport zaldarynyń qyzmeti toqtatylady. Saýda ortalyqtarynyń jumysy shekteldi.
Dál osyndai jaǵdai Chehiia, Bolgariia, Slovakiia, Serbiiada da oryn aldy. Bul memleketter sheteldik azamattardyń kelýine tyiym saldy. Máselen, Chehiia astanasynda tipti qoǵamdyq tamaqtaný oryndary jabyldy. Olardyń kópshiligi taǵam jetkizý qyzmetterimen birlesip jumys isteidi.
15 naýryzda taǵy bir el – Ispaniia Tótenshe jaǵdai engizetinin jariialady. Tótenshe jaǵdai 15 kúnge sozylady. Bilik koronavirýstyq infektsiianyń jappai taralý qaýpi bolǵandyqtan, el ishindegi qozǵalysty shekteýdi uiǵardy. Tótenshe jaǵdaidy Ispaniia premer-ministri Pedro Sanches ministrler kabinetindegi jeti saǵattyq kelissózderden keiin jariialady. Munda turǵyndarǵa qajet kezde ǵana úiden shyǵýǵa ruqsat etiledi.
15 naýryzda Serbiia Prezidenti Aleksandr Výchich turǵyndar aldynda sóilegen sózinde el aýmaǵyna Tótenshe jaǵdai engiziletinin málimdedi. Sonymen birge, Prezident, sharalardyń eń aldymen infektsiia juqtyrý qaýpi bar qarttardy qorǵaýǵa baǵyttalǵanyn atap ótti. Serbiiadaǵy balabaqshalar, mektepter, ýniversitetter jabyq. Memleket sheteldik azamattarǵa, atap aitqanda, Italiia, Iran, Qytai, Ońtústik Koreia, Shveitsariiadan kelgenderge tyiym saldy.
Búginnen bastap Slovakiiada Tótenshe jaǵdai engizildi. Azyq-túlik dúkenderi men dárihanalardy qospaǵanda, barlyq saýda oryndarynyń jumysy toqtatylyp, bankter men poshta bólimsheleri jumys isteýge ruqsat etildi.
Koronavirýstyń beti qaita bastaǵanymen Beijińde joǵary deńgeidegi tótenshe jaǵdai toqtatylmady. QHR-dyń 24 ákimshilik-aýmaqtyq bóliginde halyqtyń densaýlyǵyna bailanysty tótenshe jaǵdailarǵa den qoiý deńgeii tómendetilse de, Beijiń, Shanhai, Tiantszin siiaqty megapolisterinde eń joǵary deńgeide qala beredi.
Azamattardyń ómiri men densaýlyǵyn qorǵaý maqsatynda QR Prezidentiniń Jarlyǵymen Qazaqstan Respýblikasynyń barlyq aýmaǵynda 2020 jylǵy 16 naýryzdan 2020 jylǵy 15 sáýirge deiin tótenshe jaǵdai engizildi.
Sondai-aq, Qazaqstan azamattaryna 15 sáýirge deiin el aýmaǵynan shyǵýǵa tyiym salyndy.
QR Prezidenti Qasym-Jomart Toqaev el halqyna úndeý joldady.
