Dúniejúzilik densaýlyq saqtaý uiymy koronavirýstan ólim-jitimdi azaitýda jaqsy nátije kórsetken deksametazon preparatynyń óndirisin arttyrýǵa shaqyrdy. "Ult aqparat" bul týraly bbc.com saityna silteme jasap habarlaidy.
DDU basshysy Tedros Adhanom Gebreiesýstiń aitýynsha, deksametazonǵa suranys Oksford ýniversitetiniń ǵalymdary preparatqa júrgizilgen zertteý nátijelerin jariialaǵannan keiin birden artqan. Klinikalyq synaq kezinde statsionardaǵy 2 myńǵa jýyq naýqas atalmysh preparatty qabyldaǵan. Anyqtalǵandai, ókpeni jeldetý apparatyna qosylǵan naýqastar arasynda ólim jaǵdailary - 40-tan 28 paiyzǵa deiin, al Ekstrakorporaldyq membrandy oksigenatsiiadaǵy (EKMO) naýqastardyń arasynda 25-ten 20 paiyzǵa azaiǵan.
«Biz úshin kelesi synaq – deksametazon óndirisin ulǵaitý, sondai-aq ony álem boiynsha jyldam ári ádil taratý bolyp otyr. Bul rette, qajettilik joǵary elderge basymdyq beriledi», - dedi DDU basshysy.
Málim etilgendei, deksametazon meditsinada 60 jyldan beri qoldanylyp keledi. Onyń qabynýǵa qarsy áseri joǵary. DDU preparatty tek aýyr jaǵdaidaǵy naýqastarǵa jáne dárigerlerdiń baqylaýymen ǵana berýge bolatynyn eskertedi.
Latyn Amerikadaǵy ólim jaǵdailary
Djons Hopkins ýniversitetiniń derekterine sáikes, Latyn Amerika jáne Karib basseininiń elderinde koronavirýstan qaitys bolǵandar sany 100 myńnan asyp jyǵyldy.
Ólim jaǵdailarynyń jartysynan astamy Braziliiada tirkeldi. Bul el indetti juqtyrý jáne odan bolǵan ólim oqiǵalary boiynsha AQSh-tan keiin ekinshi orynda tur. Meksikada 23 myńnan astam adam kóz jumdy. Braziliia jáne Meksika kórshi elderi siiaqty qatań karantindik sharalardy engizbegen bolatyn.
Ólim-jitim jaǵdailary, sondai-aq Perý jáne Chilide kóp – sáikesinshe 8,4 myń jáne 4,5 myń adam.
Sarapshylardyń paiymynsha, keibir elder pandemiianyń sharyqtaý sheginen áli ótken joq.
Delide jańa jaǵdailar artýda
Úndistan astanasy Delide bir táýlikte 4 myńǵa jýyq adamnan koronavirýs anyqtaldy. Bul, pandemiia bastalǵan ýaqyttan bergi eń joǵary kórsetkish. Delide barlyǵy 66 myńǵa tarta adam indetke shaldyqqan. Syrqattaný ósimi kún sanap artyp keledi. Bilik ókilderi adamdardyń júrip-turýyn jáne bailanysta bolǵandardy anyqtaýdy jiti baqylaýǵa alatynyna ýáde etýde. Jýyrda Úndistan karantin sharalaryn jeńildetken bolatyn. Alaida, virýstyń taralý qarqyny basylar emes. Jalpy elde koronavirýs 440 myńnan astam adamnan anyqtaldy. Qaitys boldy – 14,4 myń naýqas.
Eýropalyq odaq jáne Maldiv eli týristerdi qabyldaýǵa daiyn. Niý-Iork sýǵa shomylýǵa ruqsat bermek
Maldiv prezidenti Ibragim Solih óz eli týristerdi 15 shildeden bastap qabyldaitynyn málimdedi. Bul rette, sheteldik qonaqtarǵa koronavirýsqa test nátijesin kórsetýdiń qajeti joq. Maldiv úshin týrizm tabystyń negizgi kózi bolyp tabylady. Pandemiia saldarynan naýryz aiynan beri halyqaralyq qatynas toqtaǵan bolatyn. Osy ýaqytqa deiin koronavirýs 2200 adamnan anyqtaldy.
Eýroodaq shekarany 1 shildeden bastap ashýdy josparlap otyr. Alaida, koronavirýs boiynsha ahýal kúrdeli eldermen shekara jabyq kúiinde qalady. Atap aitqanda, AQSh pen Reseiden keletin týristerdi ázirge kirgizbeý usynylyp otyr. EO elderi qandai memleketterdi qaýipsiz sanaýǵa bolatynyn anyqtaityn kriteriilerdi ázirleýi qajet.
Niý-Iorkte 1 shildeden jaǵajaida sýǵa shomylýǵa ruqsat berilmek. Bul týraly qala meri Bill de Blazio málim etken. «Saqtyqty umytpaiyq, jaǵajaida da áleýmettik qashyqtyqty ustanyp, maska taǵaiyq», - dep jazdy ol Twitter-de. Qalada jaǵajailar 25 mamyrdan bastap ashylǵanymen, shomylýǵa tyiym salynǵan.
