Jańa COVID-19 koronavirýsynyń taralyp ketpeýiniń aldyn alý úshin engizilgen karantin sharalaryna bailanysty álemniń kóptegen qalalarynda kóshe qańyrap bos qaldy. Bul týraly Yahoo News basylymy habarlady.
Jahandy jailaǵan virýs Ispaniia, Italiia, Japoniia jáne Chili, sonymen qatar Ulybritaniia sekildi memleketterdiń elde tótenshe jaǵdai jariialaýyna sebep boldy. Osy jaǵdai tabiǵatqa da áser etýde. Bos qalǵan kóshelerdi adamnyń ornyna jabaiy ańdar kezip júr.
Ýelstiń soltústiginde teńiz jaǵalaýyndaǵy Llandidno qalasynyń kóshelerin Orme taýynan túsken jabaiy taý eshkileri erkin aralap júr. Janýarlar adam bolmaǵandyqtan qalaǵa qoryqpai kirgen kórinedi.
Úndistandaǵy Odishede jaǵalaý mańynda júzdegen tasbaqa baiqalǵan.
Shyǵys Londonda bir úiir buǵy Garold Hill turǵyn úi keshenine erkin ornalasyp aldy. Boljam boiynsha, júzge jýyq buǵy kórshiles Dagnam qoryǵynan kelgen.
Osyǵan uqsas sýretter Japoniianyń Nara qalasynda da túsirilgen. Shamamen 100 jabaiy buǵy qalany kezip júr. Ádette, bul janýarlar qoryq mańynda júretin, olardy týrister tamaqtandyratyn. Endi olar azyq izdep qala kóshelerin sharlaýǵa kiristi.
Úndistannyń halyq tyǵyz ornalasqan aýdandarynyń biri Ýttar-Pradeshtegi Tirýpati qalasynan da turǵyndar teńbil buǵylardy baiqaǵan. Aita ketsek, elde 1,3 milliardqa jýyq adam bar.
Italiianyń koronavirýstan eń kóp zardap shekken aýdandarynyń biri Bergamoda jabaiy qaban júrgenin kórgender bar.
Sońǵy málimet boiynsha, álemde koronavirýs juqtyrǵandar sany 1 millionnan asyp, 50 myńnan astam adam kóz jumdy.
