Elorada jansaqtaý bóliminde koronavirýspen 73 naýqas jatyr. Bul týraly Nur-Sultan qalalyq qoǵamdyq densaýlyq saqtaý basqarmasy basshysynyń mindetin atqarýshy Áliia Rústemova aitty, dep habarlaidy QazAqparat.
«20 mamyrǵa deiin kúnine orta eseppen shamamen 360 jańa jaǵdai tirkelgen bolsa, mamyrdyń ekinshi jartysynan bastap 200-ge jýyq derek tirkeldi. Maýsymnyń 9 kúniniń ishinde koronavirýs infektsiiasynyń 1 721 jańa jaǵdaiy anyqtaldy.
Juqpaly aýrýlar aýrýhanalarynda emdelýshiler sany da azaidy. Qazir aýrýhanalardyń júktemesi mamyrdyń basyndaǵy 63 paiyzdan 37 paiyzǵa deiin tómendedi. Buǵan halyqty vaktsinalaý mańyzdy ról atqardy dep sanaimyz», - dedi ol.
Onyń atap ótýinshe, patsientter sanynyń tómendeýine bailanysty sońǵy bir aptada jalpy sany 240 tósek-oryndy quraǵan 3 infektsiialyq aýrýhana jabylyp, bir juqpaly aýrýlar aýrýhanasyndaǵy kereýetter 130 tósek-orynǵa qysqardy.
«Alaida, aýrýhanalarǵa aýyr jáne óte aýyr jaǵdaida túsetin naýqastardyń sany azaimai otyrǵanyn atap ótkim keledi. Máselen, búginde jansaqtaý bóliminde 73 naýqas jatyr, onyń 19-y ókpeni jeldetý apparatyna qosylǵan. Olardyń 70 paiyzy 60 jastan asqan adamdar, orta jastaǵy adamdar da jatyr. Onyń ústine barlyǵynda aýrýdyń aǵymyn qiyndatatyn janama aýrýlar bar. Buǵan qosa, naýqastardyń 80 paiyzy úide ózin-ózi emdep, dárigerlerge qaralmaǵan, kásibi meditsinalyq kómekke júginbegen», - dedi Áliia Rústemova.
