Foto: gov.kz
25 qańtarda Máskeýde Eýraziialyq ekonomikalyq odaqqa kiretin memleketter balalardyń psihikalyq damýyna jaǵymsyz áser etetin oiynshyqtarǵa qoiylatyn talaptardy ázirleýge kelisti, dep habarlaidy "Ult aqparat" Saýda jáne integratsiia ministrligine silteme jasap.
«Psihologiialyq-pedagogikalyq qaýipsizdik» talaptaryn engizý usynysy naryqta qorqynyshty, kúsh kórsetý belgileri bar, gibridti jáne t. b. oiynshyqtardyń jii kezdesýimen bailanysty jasalyp otyr. Keibir psihologtardyń pikirinshe, mundai «qorqynyshty» oiynshyqtar zorlyq-zombylyq pen agressiiamen bailanysty oiyn siýjetin týdyrady.
Oiynshyqtarǵa arnalǵan qoldanystaǵy tehnikalyq reglamentte tek materialdarǵa, toksikologiialyq-gigienalyq jáne mikrobiologiialyq kórsetkishterge, fizikalyq jáne mehanikalyq, himiialyq jáne elektrlik qasietterge, radiatsiialyq qaýipsizdikke qoiylatyn talaptar ǵana belgilengen. Osylaisha, naryqtan «qorqynyshty» oiynshyqtardy alyp tastaý múmkin emes.
Otyrysta qazaqstandyq tarap bul máseleni qarastyrý úshin oiynshyqtyń balaǵa keri áserin anyqtaityn ólshemderdi belgileitin standarttar qajet jetkizdi.
«Balalardyń fizikalyq jáne psihikalyq densaýlyǵyn qalyptastyrýdyń mańyzdylyǵy kúmán týdyrmaidy. Qazaqstan 2015 jyly oiynshyqtarǵa psihologiialyq-pedagogikalyq saraptama júrgizý úshin tehnikalyq reglamentke ózgerister engizýge bastamashy boldy. Ol kezde mundai oiynshyqtardyń balanyń psihikasyna jaǵymsyz áser etý kriteriilerin aiqyndaý standartynyń bolmaýyna, ǵylymi zertteýler júrgizý qajettiligine bailanysty qujat qoldaý tappady», — dedi EEK Keńesinde QR Densaýlyq saqtaý vitse-ministri Aijan Esmaǵambetova.
Onyń aitýynsha, búginde naryq túrli oiynshyqtar bar. Sondyqtan oiynshyqtardyń balanyń psihikasyna keri áser etý kriteriilerin aiqyndaý standartyn ázirleý jáne Eýraziialyq Odaq elderi deńgeiinde tiisti tártipte pysyqtaý úshin qoldanystaǵy tehnikalyq reglamentterdi ózgertý jóninde usynystar engizý usynylyp otyr.
