QR Qorǵanys ministriniń orynbasary Rýslan Shpekbaev «QazAqparat» halyqaralyq aqparat agenttigine áskeri qoimalar men oq-dári saqtaityn bazalardyń qaýipsizdigin qamtamasyz etý úshin qandai sharalar qabyldanyp jatqanyn aitty.
«Arys qalasyndaǵy jarylystan keiin Qorǵanys ministrligi zymyrandar men oq-dárilerdi saqtaý nysandarynda tótenshe jaǵdailardyń aldyn alýǵa baǵyttalǵan sharalar qabyldaǵan bolatyn. Osy eki jyldyń ishinde normativtik quqyqtyq bazany jetildirildi. Byltyr mamyr aiynda «Qazaqstan Respýblikasynyń keibir zańnamalyq aktilerine Qarýly Kúshterdiń, basqa da áskerler men áskeri quralymdardyń arsenaldary, bazalary men qoimalary janyndaǵy tyiym salynǵan aimaqtar men tyiym salynǵan aýdandar máseleleri boiynsha ózgerister men tolyqtyrýlar engizý týraly» Zańǵa qol qoiyldy. Osy zańdy iske asyrý úshin Úkimet qaýlysymen tyiym salynǵan aimaqtar men aýdandardy belgileý erejesi qabyldandy. Budan basqa, oq-dárilerdi uiymdastyrýdy jáne saqtaý tártibin reglamentteitin vedomstvolyq normativtik quqyqtyq aktiler qaita qaraldy», - deidi ministrdik orynbasary.
Onyń sózine qaraǵanda, qorǵanys zańnamasyna áli de ózgerister enýi múmkin. Sonyń biri qaýipti oq-dáriniń kózin joiý máselesimen bailanysty.
«Bizdiń bastamamyzben zańnamaǵa Qorǵanys ministrligine saqtaý obektilerine qaýip tóndiretin nemese qaýip tóndirýi yqtimal oq-dárilerdi óz betinshe joiý quzyretin beretin ózgerister men tolyqtyrýlar engizilýde. Qazirgi tártip boiynsha paidalanylmaityn oq-dárilerdiń bári Indýstriia jáne infraqurylymdyq damý ministrliginiń «Qaztehnologiia» AQ vedomstvolyq uiymyna beriledi. Sol uiym qoldanystan shyqqan oq-dárini ónerkásiptik tásilmen kádege jaratady», - deidi Rýslan Shpekbaev.
Qorǵanys ministrligi Qarýly Kúshterde qarý-jaraq pen oq-dárilerdi saqtaý obektilerin jetildirý jónindegi 2019-2024 jyldarǵa arnalǵan keshendi jospar ázirlegen. Vedomstvo ókiliniń aitýynsha, sol jospardaǵy is-sharalardyń áli 50%-y oryndalmaǵan.
«Búgingi kúni qaýipsizdik talaptaryn jáne olardyń eldi mekenderden qashyqtyǵyn eskere otyryp, oq-dárilerdi saqtaityn jańa bazalary men arsenaldaryn salý jónindegi máseleler kesheni sheshildi», - dedi Qorǵanys ministriniń orynbasary.
