Qorǵanys vedomstvosynyń basshysy, general-leitenant Murat Bektanov apparattyq keńes barysynda Qarýly Kúshterde Prezidenttiń Qazaqstan halqyna Joldaýyn iske asyrýǵa qatysty birqatar tapsyrmalar berdi. Bul týraly Qorǵanys ministrliginiń baspasóz qyzmeti habarlady.
Qorǵanys ministri áskerge qatysty aspektilerge nazar aýdara otyryp, Joldaýdyń negizgi erejelerin jetkizdi.
Qorǵanys qabiletin nyǵaitý, qaýip-qaterlerge jedel den qoiýdy arttyrý aiasynda, 3 qyrkúiekten bastap-aq Qarýly Kúshterde áskerlerdi qaýyrt tekserý júrgizilýde. Áskeri quralymdar men bólimder jaýyngerlik oqý-jattyǵý tapsyrmalaryn oryndaý úshin turaqty ornalasqan pýnktterinen eldiń basqa óńirlerine jiberiledi.
Qorǵanys vedomstvosynyń basshysy oryn alýy múmkin qaýipter men qaterlerge sáikes áskerlerdiń is júzindegi áreketin tolyq deńgeide tekserýdi tapsyrdy.
Ótken demalys kúnderi Jambyl oblysyndaǵy injenerlik oq-dáriler qoimasyna barǵan qorǵanys vedomstvosynyń basshysy qaza tapqandardyń otbasylaryna jáne barlyq zardap shekkenderge jan-jaqty kómek kórsetýdi jalǵastyrýdy tapsyrdy.
Murat Bektanov oqiǵa saldaryn joiýǵa qajetti kúshter men quraldardy tartýdy júktedi. Belgilengen qaýipsizdik sharalaryn saqtai otyryp, barlyq jumystar barynsha qysqa merzimde júrgizilýi tiis.
Qorǵanys ministrliginiń Bas inspektsiiasy qazirgi ýaqytta oq-dáriler qoimalaryn tekserýge qatysty júrgizilip jatqan is-sharalar jóninde baiandady. Qorǵanys ministri komissiiaǵa inspektsiialaý nátijeleri týraly tez arada aqparat berýdi jáne oq-dárilerdi saqtaý obektileri men halyqtyń qaýipsizdigin qamtamasyz etý boiynsha qajetti sharalardy qabyldaýǵa bastama tanytýdy tapsyrdy.
Qorǵanys vedomstvosynyń basshysy jeke quramǵa beinekonferentsbailanys rejiminde shyqty. Burynǵy Qorǵanys ministri naǵyz ofitser retinde barlyq jaýapkershilikti óz moinyna alyp, otstavkaǵa bergenin atap ótti.
Sonymen qatar, ol jalpyáskeri jarǵylarda árbir laýazymdy tulǵanyń mindetteri kózdelgenin eske saldy. Bul rette barlyq áskeri qyzmetshiler tapsyrylǵan jumysqa zańdy ári moraldy turǵyda jaýapty bolýy tiis.
General-leitenant Murat Bektanov laýazymdy tulǵalardyń quzyretine nazar aýdardy. Ol úshin jaýapty jáne basshy laýazymdarǵa qajetti tájiribesi bar jáne muqiiat konkýrstyq irikteýden ótken adamdar taǵaiyndalýy tiis.
Qorǵanys ministri Qarýly Kúshterde negizinen kásibi daiyndalǵan áskeri qyzmetshiler, óz eliniń patriottary qyzmet atqaratynyn atap ótti. Sonymen qatar, kez kelgen qatelik nemese jańsaqtyq aýyr zardaptarǵa ákep soǵýy múmkin.
«Áskeri qyzmetshiler qarý-jaraqpen, jaýyngerlik tehnikamen, oq-dárilermen jáne jarylǵysh zattarmen udaiy jumys isteidi. Áskeri qyzmet árqashan qaýip pen qaterge toly. Sonda da árbirimiz qatelik jasaýǵa quqyǵymyz joq. Mindetterin tiisinshe oryndamaǵan jaǵdaida, onyń suraýy da qatań bolady», – dedi Qorǵanys ministri.
