Koreia Respýblikasynyń delegatsiiasy búgin Qyzylordada japon basqynshylaryna qarsy korei partizandyq qozǵalysynyń batyry bolǵan general Hon Bom Donyń súiegin eline jerleý úshin tabytyn týǵan jerine alyp ketti, dep habarlaidy "Ult aqparat".
Arnaiy sharada oblys ákimi Gúlshara Ábdiqalyqova, oblys ákimniń orynbasary Serik Ahmet, qala ákiminiń mindetin atqarýshy Bektas Nuridinov, oblystyq korei etno-mádeni birlestiginiń tóraǵasy Elena Kim mártebeli meimandarǵa qurmetin bildirdi.
Koreia Respýblikasynyń patriottar jáne ardagerler jónindegi ministri Hvan Gi Chhol, Koreia Respýblikasynyń Qazaqstan Respýblikasyndaǵy Tótenshe jáne Ókiletti Elshisi Ký Hong Sok, «General Hon Bom Do memorialy» qorynyń Tóraǵasy Ý Von Shik, aktior Cho Von Djýn Syr jurtynyń qaharman tulǵaǵa degen erekshe qurmeti úshin rizashylyǵyn bildirdi. Bul sapar yntymaqtastyq baǵytyndaǵy ekijaqty áriptestikti, dostyqty odan ári nyǵaitýǵa múmkindik beretinin aityp, alǵysyn jetkizdi.
Sharada Qazaqstan Respýblikasynyń sarbazdary Hon Bom Donyń súiegin tabystaý rásimin ótkizip, generaldyń tabytyn Koreia Respýblikasynyń sarbazdaryna tabys etti. Is-sharaǵa qatysýshylar Hon Bon Donyń qurmetine qoshtasý rásimin jasap, bas idi.
