Jambyl oblysy ákimi Asqar Myrzahmetovtyń tóraǵalyǵymen ótken jiynda óńirdegi kópbalaly jáne az qamtylǵan otbasylardy jataqhanamen qamtý máselesi qaraldy.
Kún tártibindegi negizgi másele boiynsha oblys ákimdiginiń qurylys basqarmasynyń basshysy Jaiyqbai Shaldarov baiandama jasady. Ol Taraz qalasy №5 «Qarasý» móltek aýdanynan salynatyn kópbalaly otbasylarǵa arnalǵan 4 kópqabatty áleýmettik jataqhananyń qurylys jobasymen tanystyrdy. Onyń aitýynsha jataqhanada barlyǵy 180 páter bolady dep josparlanýda. Joba quny 812 million teńgege ainalmaq. Qurylystyń jalpy aýmaǵy 8 100 sharshy metrdi qurasa, páterdiń bir sharshy metriniń quny 100,2 myń teńgege ainalady.
Aita ketý kerek 4 jataqhana soǵylatyn aýmaqta infraqurylym máselesi sheshilgen. Al, jataqhananyń ishki qurylysy kádimgi eki bólmeli páterlerden turady. Ondaǵy bir páterdiń jalpy aýdany 35-40 sharshy metrdi quraidy. Ár páterde zal jáne jatyn bólmeler, sondai-aq, ár páterdiń óz as úii, ájethanasy men jýynatyn (sanýzel) bólmesi de bolady.
Jospar boiynsha jobanyń barlyq qujattary aldaǵy úsh aida daiyndalyp, qurylys jumystary aǵymdaǵy jyldyń maýsym aiynda bastalyp, 1-jeltoqsanǵa deiin aiaqtalýy tiis.
Asqar Isabekuly qujattardy daiyndaý men qurylys jumystaryn barynsha jyldamdatyp, aǵymdaǵy jyldyń qazan aiyna deiin jataqhanany tapsyrý kerektigin basa aitty. Sondai-aq, óńir basshysy turǵyn úi kezeginde turǵan 23 myń adamnyń máselesin sheshý úshin óńirdegi turǵyn úi qurylysynyń kólemin barynsha arttyrý qajettigine kóńil bólip, bul baǵyttaǵy jumystardy kúsheitýdi tapsyrdy.
Jiyn barysynda «Binom» jaýapkershiligi shekteýli seriktestiginiń basshysy Serik Oljabaev uiym tarapynan biyl joba quny 203 million teńgeden bolatyn 45 páterli eki kópqabatty áleýmettik turǵyn úi soǵýdy josparlap otyrǵanyn jetkizdi. Sonymen qatar, seriktestik basshysy qoldaý bolsa, bul baǵytta aýqymdy qurylys júrgizýge múmkinshilikteri jetetinin bildirdi. Asqar Isabekuly turǵyn úi máselesin sheshýde merdigerlerdiń múmkinshiligi men áleýetin paidalanýdyń qos tarapqa da tiimdiligin tilge tiek etip, osy turǵyda tiisti tulǵalarǵa naqty tapsyrmalar júktedi. Sondai-aq, basqosýda Oblys ortalyǵy jáne Shý, Jańatas, Qarataý qalalaryndaǵy turǵyn úi kezeginde turǵan az qamtylǵan otbasylardyń jataqhana máselesin sheshý joldary saralanyp, jańa ǵimarat soǵý nemese bos nysandardy satyp alyp, yńǵailastyrý sharalary jan-jaqty talqylandy.
