«Ryjii Almaz» Qazaq Sovettik Sotsialistik Respýblikasyn uzaq jyldar basqarǵan, iri memleket qairatkeri Dinmuhammed Qonaevpen atamyzdyń ómiriniń sońǵy jyldarynda kezdesken. Bul týraly Nesipbai Násenovtiń dosynyń (avtoryn belgili bir sebeptermen aita almaimyz) esteliginde táptishtep jazylǵan.
«– Dimash Ahmetuly, mine sizge jurt aityp júretin «Ryjii Almazdy» ákeldim, tanysyp qoiyńyz, – dep Iu. Koshkin jańa tanysyn tanystyrdy.
– Amansyń ba, ulym? – dep Dimash Ahmetuly qolyn sozdy. – Estýimshe, sen Semeiden ekensiń, solai ma? Al nege seni «Ryjii Almaz» dep aitady? Seniń atyń Nesipbai emes pe?
– Sálemetsiz be, Aǵa, – dedi Almaz, – iá, men shyǵystanmyn, tegim Násenov, atym Nesipbai. Jigitterimdi Nurqadilovtyń jieniniń jigitterimen shatastyryp almas úshin meni «Ryjii Almaz», ony «Chernyi Almaz» dep ataidy.
Dimash Ahmetuly Almazǵa úńilip bir qarap aldy da, tanysýǵa qolyn usyndy.
– Iá, qazir jastar búginde qoǵamda kereksiz bolyp qaldy, egerde olardy qadaǵalap otyrmasań, óz jolyndaǵynyń barlyǵyn jaipap óter úlken tasqyn, sel siiaqty alyp kúsh emes pe? Anaý 86-nyń Jeltoqsanynda búkil Sovet Odaǵynyń alyp kúshi bolmasa nemen aiaqtalar edi. Mendei qart adamdy umytpai kelgenińe rahmet, kelip, aqyl-keńes alyp tur. Iýra (Iýrii Koshkin – red.), men de saǵan aittym emes pe, seniń alyp kelgen adamdaryńnyń barlyǵyna senemin dep. Shynymdy aitsam, qazirgi jastarmen áńgimeleskenime qýanamyn. Sen mynaǵan jaýap bershi, qazir jastarmen jumys isteitin eshqandai uiym qalmaǵan ba? Komsomoldar qaida? Qazaqstan jastarynyń odaǵy qaida? – dep ol Almazǵa qarady.
– Jastar odaǵy bar, Aǵa, biraq onda jastardyń bolashaǵyna nemquraily qaraityn adamdar otyr. Olar ózderi birneshe deldaldyq firma ashyp alǵan. Óz qara bastarynyń qamdaryn ǵana oilaidy. Al jastar, ásirese kishkentai qalashyq, aýyldarda turatyn jastardyń bolashaǵyna bas qatyrmaidy da. Mine, men solarǵa kómektesýge tyrysam, tym quryǵanda sportshylarǵa, qazir sporttyń ózimen de eshkimniń jumysy joq, bárine aqsha aralasyp ketti ǵoi.
– Iá, ulym, sen durys aitasyń, qazir tek sportqa ǵana emes, jastardyń rýhani damýyna, tárbiesine de durys kóńil bólinbeidi. Eger shyn janashyrlyq tanytyp júrseń, rahmet saǵan, Sovet odaǵy qiraǵannan keiin elimizde qalyptasqan qiyn jaǵdaida tym qurysa bir bos qalǵan keńistikti toltyryp jatqanyńa. Iýra, saǵan da rahmet, maǵan Qazaqstan jastarynyń kóshbasshysyn ákelip tanystyrǵanyńa!»
