«Kólsai kólderi» ulttyq memlekettik tabiǵi parki IýNESKO-yń búkilálemdik biosferalyq rezervattar jelisine qosylýy múmkin.
Bul týraly 30 qyrkúiekte Ekologiia ministriniń orynbasary Erlan Nysanbaevtyń qatysýymen ótken «Kólsai kólderi» memlekettik ulttyq tabiǵi parkiniń damý tujyrymdasynyń tanystyrylymy barysynda aityldy, dep habarlaidy "Ult aqparat" QR Ekologiia, geologiia jáne tabiǵi resýrstar ministrliginiń baspasóz qyzmetine silteme jasap.
«Keshe Parijdegi bizdiń diplomattarymyz «Kólsai kólderin» IýNESKO-nyń búkilálemdik rezervattar qataryna qosý týraly ótinish bergenin habarlaimyn. Bir jyl ishinde ótinishke baǵa beriledi. Shamamen keler jyldyń maýsym aiynda sheshim qabyldanady», - dedi IýNESKO-nyń qazaqstandyq «Adam jáne biosfera» ulttyq komitettiń tóraǵasy, zoologiia institýtynyń bas direktory Roman Iashenko jiyn barysynda.
Onyń sózinshe, ulttyq park atalǵan tizimge kirý arqyly halyqaralyq deńgeige kóteriledi. Álemdik qaýymdastyq aldynda ekojúieni saqtaýǵa qatysty jaýapkershilik artady.
Qazir Ekologiia, geologiia jáne tabiǵi resýrstar ministrligi «Kólsai kólderi» ulttyq parkinde ekotýrizmdi damytýdy qolǵa almaq. Basty ideia – onda týristerdiń kelýin qamtamasyz ete otyryp, ekojúiege ziian keltirmeý.
«Kólsai kólderi» ulttyq parkinde ekotýrizmdi damytýdy qolǵa alǵan investor jumysyn baqylaityn qoǵamdyq keńes te qurylmaq.
