QR Bilim jáne ǵylym ministri Ashat Aimaǵambetov kolledjderge memlekettik tapsyrysty az bergen óńirlerdi atady, dep habarlaidy QazAqparat.
«Jastardy tegin kásiptik-tehnikalyq bilimmen qamtý máselesi óte mańyzdy. Jalpy biyl ákimdikter tarapynan 96 myń orynǵa memlekettik tapsyrys berildi. Biraq, NEET sanatyndaǵy jastardyń eń kóp joǵary úlesine qaramastan Túrkistan, Jambyl oblystarynda kolledjderge memlekettik tapsyrystyń tómendeýine jol berilgen. Sondyqtan ákimdikter bul máseleni qolǵa alyp, qajetti is-sharalardy qabyldaýyn suraimyn», - dedi Ashat Aimaǵambetov búgin Úkimet otyrysynda.
Ministrdiń aitýynsha, oqý jyly uiymdasqan túrde bastalýy úshin oblystardyń, Almaty, Shymkent, Nur-Sultan qalalarynyń ákimdikteri birqatar máseleni baqylaýda alýy tiis.
«Barlyq bilim alýshylar úshin oqýlyqtardyń ýaqtyly jetkizilýin qamtamasyz etý qajet. Bilim berý uiymdaryn kúrdeli jáne aǵymdaǵy jóndeý jumystaryn merziminde atqarý, qajetti sanitarlyq jáne dezinfektsiialyq quraldarmen tolyq qamtamasyz etý, áleýmettik turǵydan osal otbasylardyń balalaryn jappai oqytý qorynan tasymaldaýdy, tamaqtandyrýdy jáne qoldaýdy ýaqytyly uiymdastyrý, internetpen jáne tsifrlyq platformalardy qosýmen tolyqtai qamtamasyz etý, balalardyń qaýipsizdigin qamtamasyz etý úshin tiisti is-sharalardy aiaqtaý kerek», - dedi ol.
