Foto:depositphotos.com
Ádilet vitse-ministri Botagóz Jaqselekova bul normany ózgertý úshin qandai zańnamalyq áreketter qajet ekenin túsindirdi, dep habarlaidy Ult.kz.
Onyń aitýynsha, Ákimshilik quqyq buzýshylyq týraly kodekske (ÁQBtK) engiziletin ózgerister men tolyqtyrýlar tiisti vedomstvoaralyq komissiianyń qaraýynan ótedi. Komissiia quramyna shamamen on memlekettik organ kiredi, al másele belgili bir salaǵa qatysty bolsa, basqa múddeli taraptardyń qatysýyna shekteý qoiylmaidy.
"Komissiia quramyna tek múddeli memlekettik organdar ǵana emes, Parlament depýtattary men ǵylymi qaýymdastyq ókilderi de kiredi. Sebebi ózgerister engizý, ásirese, dispozitsiia men sanktsiia turǵysynan, óte muqiiat ári teńgerimdi túrde jasalýy qajet. Eger osy taqyryp boiynsha depýtattyq saýal qoiylsa, másele talqylaýǵa shyǵarylyp, qaralady. Onyń nátijeleri boiynsha qosymsha habarlanady dep oilaimyn", – dedi Botagóz Jaqselekova Senat kýlýarynda.
Bul taqyryp qoǵamda úlken talqyǵa túsken edi. Májilis depýtaty Serik Erýbaev sýyq mezgilde kólikti qyzdyrý merzimine qatysty normany qaita qaraýdy usynǵan. Alaida ishki ister ministriniń orynbasary Marat Qojaev, bul talap burynnan bar jáne onyń maqsaty – ekologiialyq standarttardy saqtaý dep túsindirgen.
Jaqynda Petropavl qalasynda júrgizýshige kólikti bes minýttan artyq qyzdyrǵany úshin 5 AEK mólsherinde aiyppul salynǵan oqiǵa qyzý pikirtalas týdyrdy. Júrgizýshige kórshileriniń shaǵymynan keiin aiyppul kelgeni belgili boldy, endi ol 5 AEK (19 660 teńge) tóleýge májbúr bolady.
