Foto: "Diapazon"
Úkimet basshysynyń orynbasary Qanat Bozymbaev eldegi sý tasqyny jaǵdaiyna bailanysty jaǵdaidy baian etti, dep habarlaidy Ulysmedia.kz.
Qanat Bozymbaevtyń aitýynsha, eldegi sý tasqyny jaǵdaiy jalpy turaqtalyp keledi. Osy aptada Atyraý oblysynda sý tasqynynyń qaýipti kezeńi kútiledi. Qazir Jaiyq ózenindegi sý deńgeii Inderbor jáne Mahambet sý beketterinde qaýipti belgilerden asyp túsken.
«Elimizdiń 8 óńirinde jergilikti aýqymdaǵy tótenshe jaǵdai rejimi saqtalyp otyr. Eki eldi meken (Aqtóbe oblysy) áli de kólik qatynasynsyz. Olar azyq-túlikpen jáne dári-dármektermen qamtamasyz etilgen. Tiisti qyzmetter jergilikti jerlerde jedel dezinfektsiialyq is-sharalar júrgizip jatyr. Sý tasqynyna qarsy is-sharalardy júrgizý úshin 7 myńnan astam adam jáne 1900 birlik tehnika, onyń ishinde 6 áýe kemesi jumyldyryldy. TJM, politsiia, Ulttyq ulan, Qorǵanys ministrliginiń, jergilikti atqarýshy organdardyń kúshteri men quraldary tartyldy, sondai-aq jeke uiymdar men eriktiler qatysady», - deidi ol.
Bozymbaevtyń aitýynsha, sý basý aimaqtarynan 119 myńnan astam adam evakýatsiialanǵan. Onyń 44 myńy balalar. Búgingi tańda óz úilerine 55,6 myń adam oraldy. Evakopýnktterde shamamen 5 myń adam qalǵan, týystarynda 58 myńnan astam adam ornalasqan.
«Sý tasqyny jaǵdaiynyń qorytyndysy boiynsha elimizde 12 908 turǵyn úi sý astynda qaldy, onyń ishinde 3 óńirde (Aqtóbe (144 úi), Atyraý (14) jáne Soltústik Qazaqstan (106) oblystarynda 264 úi áli de sý astynda qalyp otyr. Sondai-aq, 25 921 saiajai ýchaskesi sý astynda qaldy, onda 18 025 saiajai úii bar (6016 úi zardap shekkender úshin jalǵyz turǵyn úii bolyp tabylady)», - deidi ol.
