Kassatsiialyq sot avtokólikti zańsyz ielendi dep tanylyp, bes jylǵa bas bostandyǵynan aiyrylǵan qazaqstandyqqa qatysty tómengi sottardyń úkimin joidy. Qylmystyq is toqtatylyp, er adam qamaýdan bosatyldy, dep habarlaidy ult.kz.
Is materialdaryna sáikes, oqiǵa 2024 jylǵy 23 qazanda bolǵan. Er adam júrgizýshiniń Hyundai Elantra kóliginen qysqa ýaqytqa shyǵyp ketkenin paidalanyp, rólge otyrǵan. Onyń túsindirýinshe, ol júrgizýshiniń ótinishi boiynsha joldy bosatý úshin kólikti basqa jerge qoiý maqsatynda kólik basqarǵan.
Alaida qozǵalys kezinde Hyundai Elantra taǵy eki kólikpen soqtyǵysqan.
Birinshi instantsiia soty er adamdy kólikti jymqyrý maqsatynsyz zańsyz ielendi dep tanyp, bes jylǵa bas bostandyǵynan aiyrǵan. Apelliatsiialyq sot bul úkimdi ózgerissiz qaldyrǵan.
Sottalýshy kassatsiialyq shaǵym túsirgen.
Kassatsiialyq sot aiyptaý tarapy kólikti zańsyz ielenýge baǵyttalǵan tikelei niettiń bolǵanyn dáleldei almaǵan degen qorytyndyǵa kelgen.
Sot oqiǵanyń beinejazbasy joq ekenin, kóliktiń qozǵalysyn kórgen kýágerler anyqtalmaǵanyn jáne jol-kólik oqiǵasynyń syzbasy kóliktiń naqty qansha qashyqtyqqa qozǵalǵanyn ári soqtyǵysqan jerin anyqtaýǵa múmkindik bermeitinin eskergen.
Sonymen qatar sot aktilerinde keltirilgen zalal kóleminiń ártúrli kórsetilgenine nazar aýdarylǵan.
Osyǵan bailanysty kassatsiialyq sot tómengi sottardyń sheshimderiniń kúshin joiyp, qylmystyq quqyq buzýshylyq quramynyń bolmaýyna bailanysty isti toqtatty.
Er adam sot zalynan dereý bosatyldy.
