Elordada nóserli jaýyn sýynyń astynda qalatyn kóshelerdiń problemasyn sheshý úshin eki-úsh jyl qajet. Bul týraly «Habar 24» telearnasyna suhbat bergen Nur-Sultan qalasynyń ákimi Altai Kólginov aitty, dep habarlaidy QazAqparat.
Suhbat barysynda A.Kólginov qala kóshelerindegi káriz júiesin retke keltirý jumystarynyń barysy týraly málim etti.
«Bul másele ásirese, kúzde, kóktemde jańbyr jaýǵanda týyndaidy. Jazdygúni nóser jańbyr jaýǵanda da sý tolyp qalatyn jerler bar. Ony qala turǵyndary jaqsy biledi. Eń problemalysy – Baýyrjan Momyshuly kóshesinde. Ol jer osydan bir-eki jyl buryn da talqylanǵan. Sodan beri ákimdikte jobalyq qujattama ázirlendi. Osyǵan uqsas taǵy bir oryn – Respýblika dańǵyly men Imanov kóshesiniń qiylysynda. Al úshinshisi – Turan dańǵylynda. Bul úsheýi – eń irisi», - dedi ol.
Elorda basshysynyń aitýynsha, jańbyr jaýǵan saiyn «109» iKOMEK ortalyǵyna da qońyraýlar kóptep túsedi.
«Áleýmettik jelilerden de habarlar túsedi. Qala boiynsha sý jinalyp qalatyn 32 oryn bar eken. Sonyń 16-synyń qazir jobalaý jumystaryn bastap kettik. Aldaǵy ýaqytta taǵy 16-syna jobalaý jumystaryn júrgizýimiz kerek. Eń ózektisi – Baýyrjan Momyshuly kóshesindegi tusqa qazir konkýrs júrgizilip jatyr. Iaǵni, jobalaý jumysy bitti. Al konkýrs aldaǵy ýaqytta bitedi. Biyl bastasaq, kelesi jyly aiaqtaýymyz kerek. Baýyrjan Momyshuly kóshesi eki kezeńnen turady. Birinshisi – injenerlik jeli, sý jinaityn káriz júiesi. Al ekinshisi sýdy tazartatyn joba bar. Bul 3 mlrd teńge turady. Ony kelesi jyly bastaityn bolamyz. Imanov kóshesindegi rásimdeý qujattarynyń bári bitti. Konkýrs aiaqtaldy, merdiger belgilendi. Olar jumysyn bastady. Aldaǵy ýaqytta bul jumystyń bastalǵanyn kórsetetin bolamyz. Ol da úlken joba. Imanov kóshesinen sýdyń bárin aǵyzyp áketý kerek. Jer qazyp 7-9 metrge deiin sýdy buratyn káriz jelilerin salýymyz qajet. Ary qarai sý jinaqtaityn orny bolady. Sony qalpyna keltirýimiz kerek», - dedi ol.
Ákimniń sózinshe, bul – úlken jumys jáne ony iske asyrýǵa eki-úsh jyl ýaqyt qajet.
«Eń bastysy, jumys bastaldy. Bul Memleket basshysynyń qadaǵalaýynda tur. Tiisti qarjy bólindi. Kóringen taýdyń alystyǵy joq. Ol jumysty aiaqtaimyz», - dep túiindedi shahar basshysy.
