Elorda ákimi Altai Kólginov 8-qabattyń terezesinen qulai jazdaǵan úsh jasar búldirshindi qutqaryp qalǵan Sábit Shontaqbaevpen kezdesti, dep habarlaidy "Ult aqparat".
"Búgin óz ómirin qaterge tige otyryp, 8-qabattyń terezesinen úsh jasar búldirshindi qutqaryp qalǵan Sábit Shontaqbaevtyń erlikke para-par qadamyna kýá boldyq. Ol elordaǵa osy jyldyń mamyr aiynyń basynda Qyzylordadan kelgen. Sábitke osyndai sátte kórsetken erligi men batyldyǵy úshin alǵys aittym!
Óz tarapymyzdan Sábittiń otbasyna tiisti kómek kórsetemiz. Bilimi men tájiribesin eskere otyryp, Lokomotiv zaýytynyń («Lokomotiv qurastyrý zaýyty» AQ) direktorymen Sábitti jumysqa ornalastyrý týraly kelistim. Buryn ol osy sala boiynsha QTJ-da jumys istegen, mamandyǵy – vagon sharýashylyǵy. Bul salada tájiribesi bar.
Sol siiaqty búkil otbasyn elordamyzǵa kóshirip ákelý týraly usynys jasadym. Sábit zaiybymen birge 4 bala (3 ul, bir qyz) ósirip otyr. Jubaiyn jumysqa turýyna, al balalaryn mektepke jáne balabaqshaǵa ornalastyrýǵa kómektesemiz. Osylaisha resmi túrde jumys istei otyryp, qyzmettik turǵyn úige úmitker bola alady, sondai-aq ózge de turǵyn úi baǵdarlamalaryna qatysa alady.
Demeýshiler esebinen otbasynyń nesiesin óteýine kómektesemiz, al jazǵy ýaqytta balalaryna Býrabaiǵa joldama beremiz. Qala turǵyndaryn saqtyq sharalaryn tolyqtai saqtaýǵa, balalaryn qaraýsyz jáne úi terezesin ashyq qaldyrmaýǵa shaqyramyn" - dep jazdy elorda ákimi Instagram-daǵy paraqshasynda.
