Foto: Polisia.kz
Ishki ister ministri Marat Ahmetjanov kúni keshe qatańdatylǵan qoǵamdyq oryndarda bylapyt sóz aitqandarǵa jazanyń kúsheiýine qatysty pikir bildirdi, dep habarlaidy QazAqparat.
«Qoǵamdyq oryndarda aitylǵan balaǵat sóz úshin jaýapkershilik buryn da bar-tuǵyn. Endigi ýaqytta ol qatańdatyldy. Aita ketetin jait, biz birden balaǵat sózge mán beremiz, al negizi zań aldymen vandalizmmen kúresýdi kózdeidi. Bizde kópqabatty turǵyn úilerdi, liftilerdi búldirý faktileri kóptep tirkelip keldi jáne aiyptylardy jaýapkershilikke tartý múmkindigi bolmady. Sondyqtan da búldirý, ziian keltirý áreketteri boiynsha jaýapkershilik kúsheidi. Onyń ishinde qoǵamdyq oryndarda balaǵat sóz aitý da bar», - dedi Marat Ahmetjanov Úkimet otyrysynan keiin jýrnalisterdiń suraǵyna jaýap bere otyryp.
Ministrdiń aitýynsha, jaýapkershiliktiń kúsheiýi qoǵamnyń dóreki sózge múldem tózbeýshilik deńgeiin arttyrady.
«Endi qoǵamdyq orynda balaǵat sóz aitqandar laiyqty jazaǵa tartylady. Sebebi kópshilik jerde bylapyt sóileý - qurmetsizdiktiń belgisi. Mysaly, men qazir balaǵat sóz aitsam jazalaýǵa bolady, óitkeni bul jerde kamera bar, dybys bar. Degenmen ómirde ártúrli jaǵdai bolady. Aitar bolsaq, baiqamai aiaǵyna balǵany qulatyp alsa, aýzynan dóreki sóz shyǵyp ketýi múmkin. Bul qoǵamdyq tártipti buzý bolyp eseptelmeidi», - deidi ol.
