Foto:Eren Bozkurt / Anadolu Agency via Getty Images
Túrkiiada jer silkinisinen zardap shekkenderge kómek retinde «Saliqaly urpaq» qoǵamdyq qorynyń atynan 500 000 dollar aýdaryldy. Bul týraly Túrkiianyń Qazaqstandaǵy tótenshe jáne ókiletti elshisi Ýfýk Ekidji men qor basshysynyń ózara kezdesýinen keiin belgili boldy. Taraptar jer silkinisinen keiingi jaǵdaida «Saliqaly urpaq» qory basqa da qandai kómek kórsete alatyny jóninde keńesti.
«Qiyn kezeńge tap bolǵan baýyrlas Túrkiia halqyna «Saliqaly urpaq» qoǵamdyq qory qarjylai kómek kórsetý týraly sheshim qabyldady. Biz jer silkinisinen zardap shekkenderge 500 000 dollar aýdardyq. Qarajat alǵashqy kerek-jaraq zattar men dári-dármek satyp alýǵa jáne ózge de qajettilikter úshin jiberildi. Baýyrlarymyz ben ápke-qaryndastarymyz bastaryna túsken qiynshylyqty kóp uzamai eńsersin dep tileimiz!» - dedi qor direktory Qasym Qasabekov.
«Saliqaly urpaq» qoǵamdyq qory 2016 jyly qaiyrymdylyq baǵytta qurylǵan. Onyń maqsaty halyqtyń osal toptaryna bilim berý jáne densaýlyq saqtaý salalarynda kómektesýge negizdelgen. Osy ýaqytqa deiin qor qaiyrymdylyq is-sharalar men aktsiialarǵa 1 milliard teńgege jýyq qarjy aýdarǵan. Atap aitsaq:
- Almaty jáne Almaty oblysyndaǵy muqtaj otbasylarǵa 1000 noýtbýk taratyldy;
- Qazaqstan musylmandary dini basqarmasymen birlese otyryp, el boiynsha 3 meshit salyndy;
- Koronavirýs infektsiiasymen kúreske 150 million teńge bólindi;
- Maqtaaral aýdanynda bolǵan sý tasqynynan zardap shekkenderge 20 úi turǵyzyldy;
- Almaty jáne Almaty oblysyndaǵy muqtaj otbasylarǵa 5 úi men 5 páter berildi;
- «Qazaqstan halqyna» áleýmettik qoryna 1 milliard teńge aýdaryldy;
Almaty jáne Almaty oblysyndaǵy kómekke muqtaj jáne kópbalaly otbasylardaǵy 2 000 oqýshyǵa kantseliariialyq zattarǵa toly riýkzaktar taratyldy;
2016 jyldan beri qor bastamasymen jetimderge arnalǵan «Bereke úii» ashyldy. Búginge deiin 70-ten astam bala tárbielendi. «Saliqaly urpaq» 5 jyldan beri balalarǵa arnalǵan lagerlerde qaiyrymdylyq sporttyq-saýyqtyrý is-sharalaryn ótkizip keledi. Sonymen qatar, jyl saiyn Almaty jáne Almaty oblysy ákimdikterimen birlesip, túrli mádeni-saýyqtyrý baǵytyndaǵy bastamalardy uiymdastyrady.
Aita keteiik, Qazaqstan Prezidenti Qasym-Jomart Toqaev Úkimetke Túrkiia elindegi apatty jer silkinisinen zardap shekkenderge jedel kómek kórsetý úshin 1 million dollar qarjy bólýdi tapsyrǵan edi. Jalpy, qazirgi ýaqytqa deiin qazaqstandyqtar Túrkiia turǵyndaryna kómek retinde 2 million 849 myń 836 dollar jinady. Barlyq qarajat AFAD resmi shotyna aýdaryldy.
