«TALAP» qoldanbaly zertteýler ortalyǵynyń direktory Rahym Oshaqbaev qoǵamdyq keńesterdiń quramy men belsendiligi týraly másele kóterdi, dep habarlaidy QazAqparat.
«Sonymen qatar, qoǵamdyq keńes qyzmetine bailanysty birqatar úlken problemalar bar. Birinshi kezekte, bul qoǵamdyq keńesterdiń quramyna bailanysty. Basshylardyń qoǵamdyq keńes quramyn ózine barynsha qolaily etip jasaqtaýǵa tyrysatyny týraly shaǵymdar kóp boldy. Shaǵymdanýshylardyń aitýynsha, qolaisyz suraq qoiatyn adamdardy keńeske kirgizbeýge tyrysatyn kórinedi», - dedi Rahym Oshaqbaev ortalyq kommýnikatsiialar qyzmetinde ótken brifingide.
Sarapshynyń sózine sensek, bul másele respýblikalyq deńgeide kóp talqylanyp, naqty sheshim qabyldanǵan.
«Nátijesinde Aqparat jáne qoǵamdyq damý ministrligi tiisti zańǵa tolyqtyrýlar engizý jóninde bastama kóterip, qujat jobasyn jasady. Bul qoǵamdyq keńes quramyn sailaý protsesin birinshi basshylardyń qalaýy men yqpalynan edáýir táýelsiz etýge múmkindik beredi. Ekinshi másele – qoǵamdyq keńesterdiń belsendiligi asa joǵary emes dep aitar edim», - dedi sarapshy.
Sondai-aq, ol Kazkenes.kz portalynyń qoǵamdyq keńes institýtyn damytýdaǵy róline toqtaldy.
«Bir jaǵynan, bul qoǵamdyq keńes músheleriniń belsendi emestigine bailanysty bolýy múmkin. Ekinshi jaǵynan, olardyń qyzmeti týraly aqparat jetispeýi múmkin. Osynyń aiasynda biz Aqparat jáne qoǵamdyq damý ministrliginiń biryńǵai portal ashý bastamasyn quptaimyz. Kazkenes.kz portaly siiaqty barsha qoǵamdyq keńesterdiń qyzmeti týraly aqparat beretin biryńǵai alań qurý bizdiń zańnamada kózdelgen», - dep túiindedi Rahym Oshaqbaev.
