Qazaqstanda mektep oqýshylary arasynda «Tulpar minip, tý alǵan!» baiqaýy ótedi. Negizgi maqsat - jastardy «Alpamys», «Er Tarǵyn», «Qobylandy batyr» jyrlary syndy xalqymyzdyń bai murasy negizinde tárbieleý, dep habarlaidy "Ult aqparat".
Baiqaý 6-10-synyp oqýshylary arasynda uiymdastyrylady. Osy joly «Qobylandy batyr» jyrynyń Marabai jyraý nusqasyn jatqa aitý qajet. Baiqaýǵa respýblika boiynsha 5 000 mektepten 50 000 oqýshy qatysady degen jospar bar. Ár mektepten 10 oqýshy (6-shy synyptan 2 oqýshy, 7-shi synyptan 2 oqýshy, 8-shi synyptan 2 oqýshy, 9-shy synyptan 2 oqýshy jáne 10-shy synyptan 2 oqýshy) qatysa alady. Joba úsh kezeńnen - aýdandyq, oblystyq jáne respýblikalyq irikteýden turady. Aýdandyq kezeńde 1-shi oryn úshin 150 000 teńge, 2-shi oryn - 100 000 teńge, 3-shi orynǵa 50 000 teńge qarastyrylǵan. Al oblystyq kezeńde 1-shi oryn úshin 1 000 000 teńge, 2-shi oryn - 600 000 teńge, 3-shi oryn alǵandarǵa 300 000 teńge tabystalady. Qazirgi kezde respýblikalyq irikteýdiń qarjylai qory pysyqtalyp jatyr.
Jobanyń aiasynda 50 000 mektep oqýshysy 107 betten turatyn «Qobylandy batyr» jyryn tolyq jattasa, atalǵan kórsetkishti Ginnes rekordtar kitabyna ótinim berý josparlanǵan.
Aita keteiik, joba QR Aqparat jáne kommýnikatsiialar ministrligi men «QAZAQ EPOS» qoǵamdyq qorynyń bastamasymen, sondai-aq QR Bilim jáne ǵylym ministrligi, «Habar» agenttigi jáne jergilikti atqarýshy organdardyń qoldaýymen júzege asyrylýda.
