Qazaqstan musylmandary dini basqarmasy qyzmetkerleriniń 95% koronavirýsqa qarsy vaktsina saldyrdy.
Málim etilgendei, QMDB qyzmetkerleri indetke qarsy ekpeni óz erkimen alǵan.
«Qazaqstan musylmandary dini basqarmasy vaktsina salýdy qoldaidy. Óitkeni Islam dininde densaýlyq – eń úlken qundylyq. Vaktsina – ǵylymnyń jetistigi desek, Islam ǵylymdy qoldaidy. Dáriger mamandar koronavirýs indetimen kúresýdiń birden-bir joly vaktsina ekenin aityp otyr. Al Islam dininde adamnyń ómiri men densaýlyǵy árqashan birinshi orynda turady. Soǵan orai QMDB tóraǵasy, Bas múfti Naýryzbai qajy Taǵanulynan bastap Dini basqarma qyzmetkerleri indetke qarsy vaktsina saldyrdy. Onyń ishinde otandyq QazVac vaktsinasyn men de saldyrdym», - deidi QMDB Tóraǵasynyń orynbasary, naib múfti Ershat qajy Ońǵar.
E.Ońǵardyń aitýynsha, vaktsinatsiia eń aldymen, óz qaýipsizdigimiz úshin qajet.
«Odan keiin otbasymyzdyń, úshinshiden, qoǵamnyń qaýipsizdigi. Mańaiymyzdaǵy áriptesterimiz, aǵaiyn-týma, dos-jarandardyń indetke shaldyqpaýy úshin ekpe alýdyń mańyzy zor. Qasietti Quranda da Alla Taǵala «Óz-ózderińdi qaýip-qaterge salmańdar!» dep eskertken. Endeshe qazaq elin dárigerlerdiń, ǵalymdardyń aitqanyna qulaq asyp, ózimiz jáne jaqyndarymyzdyń, elimizdiń amandyǵy úshin vaktsina alýǵa shaqyramyn», - dedi naib múfti.
