QR Aqparat jáne qoǵamdyq damý ministri Aida Balaeva XVII Eýraziialyq media forýmda kiberbýllingge qarsy kúres týraly pikir bildirdi, dep habarlaidy QazAqparat.
«Internettiń belsendi damýymen birge álem kiberbýlling problemasyna da tap boldy. Kez kelgen qýdalaý siiaqty, kiberbýlling te – zań júzinde toqtatylýy qajet agressiianyń bir túri. Árine, ministrlik bul baǵytta josparly jumystar júrgizip jatyr. Biz áleýmettik jelilerdiń ishki erejelerin qurmetteimiz. Adamnyń ar-namysy men qadir-qasietine nuqsan keltiretin zańǵa qaishy kontent ashyq qoljetimdikte bolmaýy tiis dep sanaimyz. BUU qararymen qabyldanǵan adam quqyqtarynyń jalpyǵa birdei deklaratsiiasynyń kirispesi dál osy qundylyqtardan bastalady», - dedi ministr forýmnyń «Pandemiia álemdi qalai ózgertti jáne jahandyq ómir súrýdiń jańa baǵyttaryn qalai anyqtady?» sessiiasynda.
Aita keteiik, búgin Nur-Sultanda XVII Eýraziialyq media forýmnyń jumysy resmi túrde ashyldy. Forým 17 qyrkúiekke deiin jalǵasady.
