Qazaqstan politsiiasy kúnine orai Hromtaýda politsiia qyzmetkeri baspanaly bolyp, aýdandyq bólimge kólik syiǵa berildi, dep habarlaidy "Ult aqparat".
Samara-Shymkent tasjoly boiynda ornalasqan Hromtaý aýdanynyń politsiia qyzmetkerleri úshin qysy-jazy jumys kóp. Qarbalas sátte shaqyrý ornyna jedel jetý, qylmystyń betin ashý, aldyn alý jumystaryna basymdyq beriledi.
Aýdan ákimi Azamat Beket saltanatty túrde aýdandyq politsiia bóliminiń inspektory Erbol Álievke páter kiltin tabystap, politsiia qyzmetkerlerin quttyqtady. Aýdan basshysy politsiia qyzmetkerleriniń qoǵamdyq tártipti qamtamasyz etý jáne aimaqtaǵy koronovirýs pandemiiasynyń taralýyna qarsy kúres jumysyna qosqan eleýli úlesin atap ótti.
«Prezident Qasym-Jomart Toqaev jergilikti politsiia qyzmetiniń qadamdyq qoljetimdiligine kóshý týraly tapsyrma berdi. Aýdan ákimi Azamat Beket politsiiaǵa avtokólik syilady. Bul kólikti biz kezekshi bólim qyzmetine beremiz. Sebebi aýdanda 28 myńnan astam halyq turady. Biz shuǵyl shaqyrýǵa 7 minýtta jetýimiz kerek. Jańa tehnika quqyqtyq tártipti qamtamasyz etýge, qylmysty boldyrmaýǵa septigin tigizedi dep senemiz.
Sonymen birge jyljymaly statsionarlyq beket qoldanysqa berildi. Ishinde arnaiy bólmeleri bar. Erler men áielderge bólek tósek-oryn qarastyrylǵan. Qysta jylytylady, jazda salqyndatqysh qosalady. Samara-Shymkent tasjolynda ornalasqan Hromtaý úshin eń qajetti tehnika. Qysta adamdar jii jolda qalady. Jazda da kómek kórsetýge týra keledi. Sol sebepti jyljymaly beketti qalanyń eki shetine qoiýdy josparlap otyrmyz», - dedi Hromtaý politsiia bóliminiń bastyǵy Quralbek Sharbakov.
Sondai-aq Hromtaý aýdany Kóktaý aýylynda ýchaskelik politsiia pýnktiniń saltanatty ashylýy ótti. Ýchaskelik politsiia pýnkti Kóktaý aýyldyq okrýgi ákimdiginiń jańa ǵimaratynda ornalasqan jáne qajetti kompiýterlik tehnikamen, jihazben jabdyqtalǵan.
Hromtaý politsiia bóliminiń bastyǵy Quralbek Sharbakov aýdan ákiminiń qoldaýynyń arqasynda biyl politsiia qyzmetiniń tiimdiligin arttyrýǵa, vedomstvonyń materialdyq-tehnikalyq bazasyn nyǵaitýǵa, sondai-aq jeke quramnyń turǵyn úi-turmystyq jaǵdaiyn jaqsartýǵa baǵyttalǵan sharalar kesheni iske asyrylǵanyn atap ótti. Aýdan basshysyna kórsetken qoldaýy úshin alǵys aityp, politsiia aldyna qoiylǵan barlyq mindetterdiń oryndalatynyna sendirdi.
Saltanatty sharaǵa ishki ister organdarynyń ardagerleri men jergilikti atqarýshy organ ókilderi de qatysty.
«Pandemiia kezinde eki qyzmetker kóz jumdy. Búgin olardyń jesirlerine baryp, arnaiy quttyqtaýymyzdy arnadyq. Qyzmet barysynda kóz jumǵan qyzmetkerlerge arnalǵan eskertkishke gúl qoidyq. Olar beibit kúnniń batyrlary», - dedi Quralbek Sharbakov.
Aita keteiik, aýdandyq politsiia bóliminde 121 qyzmetker bar. Er azamattarmen qatar áielder de qatar qyzmet etip júr.
