Harkovte "Oishyldar alleiasy" ashyldy. Onda Abai Qunanbaev beinelengen músin qoiylǵan, - dep habarlaidy Tengrinews.kz.
"Oishyldar alleiasyndaǵy" eskertkishte Abaidan basqa Ýkrainanyń halyq aqyny Grigorii Skovoroda men Ázirbaijan aǵartýshysy men filosofy Myrza Fatali Ahýndov beinelengen. Músin Ýkraina, Qazaqstan jáne Ázirbaijan arasyndaǵy dostyq qarym-qatynasty beineleidi.
Eskertkish avtory Ýkrainanyń halyq sýretshisi Seifýtdin Gýrbanovtyń aitýynsha, bul týyndy "Ómir aǵashy" dep atalady.
Eskertkishtiń jalpy biiktigi - 4 metr. Ol sýburqaqtar men jasyl jelek qorshaǵan Harkovtyń tanymal demalys aimaǵynda ornalasqan.
"Osy ideiany júzege asyrǵan músinshi Seifýtdin Gýrbanovqa, sondai-aq osy sharanyń ótýine kóp kúsh salǵan Qazaqstannyń Harkovtegi Qurmetti konsýly Emin Nadjaflige alǵys aitamyn. Búgin Harkov, Qazaqstan jáne Ázirbaijan arasyndaǵy mádeni jáne halyqaralyq qatynastardy damytýǵa berik negiz qalady dep sanaimyn", - dedi Harkov qalalyq keńesiniń hatshysy Igor Terehov.
Qazaqstannyń Ýkrainadaǵy Tótenshe jáne ókiletti elshisi Darhan Qaletaev eskertkish baýyrlas halyqtar arasyndaǵy rýhani bailanysty odan ári tereńdete túsetinin, olardyń mádenieti men óneriniń keńinen tanylýyna, damýyna jáne yntymaqtastyǵyna yqpal etetinin aita otyryp, qala basshylyǵyna jaqsy bastama úshin alǵysyn bildirdi.
"Biz bul eskertkishti ýkrain baýyrlarymyzdyń qazaq halqyna, Qazaqstannyń tarihy men rýhaniiatyna sheksiz qurmet retinde qabyldaimyz", - dedi elshi.
Aita keterligi, Qazaqstan pen Ýkraina arasyndaǵy ekonomikalyq jáne mádeni bailanys jańa deńgeige kóterilip, erekshe qarqyn ala túsken.
Sondai-aq, Qazaqstannyń elshisi Darhan Qaletaev, Qazaqstannyń qurmetti konsýly Emin Nadjafli, sondai-aq kompozitsiia avtory Seifýtdin Gýrbanov TÚRKSOI halyqaralyq túrki mádenieti uiymynyń estelik belgilerimen jáne "Abai" medalimen marapattaldy.
