Prezident Toqaev Úkimetke ishki ekonomikalyq resýrstardy jumyldyratyn jańa tásilder ázirleýdi tapsyrdy, dep habarlaidy "Ult aqparat".
"Óńirdegi jumyssyzdyq ishki jáne syrtqy kóshi-qon úderisine bailanysty kúsheiip barady. Úkimetke ishki ekonomikalyq resýrstardy jumyldyratyn jańa tásilder ázirleýdi tapsyramyn. Bul rette, halyqty ózge aimaqtarǵa kóshirý baǵdarlamasyn túbegeili qaita qaraý kerek.
Biz tarihi Otanyna oralǵan qandastardy tolyq qoldaimyz. Biraq tek Mańǵystaý óńirimen shektelýge bolmaidy. Basqa oblystarǵa, sonyń ishinde óndirisi damyǵan aimaqtarǵa qonystanýǵa bolady. Biz qajetti jaǵdaidy jasaýǵa daiynbyz" - dedi Memleket basshysy Úkimettiń keńeitilgen otyrysynda.
Qasym-Jomart Toqaev qazirgi zamanda óńirlerde, elderde, tipti qurlyqtarda jumys kúshiniń kóshi-qony júrip jatqanyn eske saldy.
"Bul zańdy qubylysqa ainaldy. Osy úrdiske bizdiń azamattar da úirenýi kerek. Kórshi elderdiń azamattary bul jaǵdaiǵa jaqsy beiimdeldi. Biz qandastarymyzdyń barlyq salada, sonyń ishinde memlekettik qyzmette jumys istegenin qalaimyz. Olar Jańa Qazaqstandy qurýǵa óz úlesin qosady dep senemin.
Qazirgi tańda jastardy jumyspen qamtýǵa basa nazar aýdaratyn kez keldi. Jyl saiyn eńbek naryǵyna 300 myńǵa jýyq jastar shyǵady. Elimizde óskeleń urpaqtyń ózin-ózi damytýyna jaǵdai jasalyp jatyr. Biraq naqty sharalarǵa qaramastan, jastardy jumyspen qamtý máselesi tolyq sheshilmei keledi. Keibir aimaqta jastar arasyndaǵy jumyssyzdyq deńgeii elimizdegi ortasha kórsetkishten aitarlyqtai joǵary. Ásirese, Nur-Sultan, Almaty qalalary, Almaty, Qaraǵandy, Soltústik Qazaqstan jáne Shyǵys Qazaqstan oblystary – sonyń qatarynda. Úkimet jáne oblys ákimderi osy máselege airyqsha nazar aýdarýǵa tiis. Jyl aiaqtalǵanda tiisti qorytyndysyn shyǵaramyz.
Eki myńynshy jyldary bala sany kúrt kóbeigeni belgili. Kelesi jyldan bastap sol kezeńde dúniege kelgen urpaq eńbek naryǵyna shyǵa bastaidy. Osyny eskergen jón. Sondyqtan, jurtty jumyspen qamtý isine qatysty tyń tásilder qoldaný qajet. Al, azamattarymyz qazirgi zamandaǵy halyqaralyq naryq úrdisine beiimdelýi kerek" - dedi Prezident.
