Halyqqa jumys istep, ipoteka tólep, úi alýǵa múmkindik berý kerek. Bul týraly Ulttyq qoǵamdyq senim keńesiniń múshesi Ýais Ersaiynuly aitty, dep habarlaidy QazAqparat.
«Áleýmettik turmysy tómen halyqty alańdatatyn másele – baspana. Qazaqstanda baspana kezeginde 500 myńnan astam adam tur. Buryn úi kezegine halyq jergilikti ákimdikter arqyly turatyn. 2019 jyldan bastap Halyqqa qyzmet kórsetý ortalyqtary arqyly kezekke tura bastady. Endi úi kezeginde 10 jyldan turǵan azamattar ózderin respýblikalyq bazadan taba almaýda. Olardyń ishinde múmkindigi shekteýli azamattar da bar. Osynyń kesirinen kóptegen otbasy «Baqytty otbasy» baǵdarlamasymen ipoteka ala almady», - dedi ol Ulttyq qoǵamdyq senim keńesiniń 6-otyrysynda.
Onyń atap ótýinshe, úi kezeginde turǵan azamattarǵa «Otbasy» banki 2 paiyzben «Baqyty otbasy» jáne 5 paiyzben «Shańyraq» baǵdarlamasy arqyly ipoteka beredi.
«Bul tiimdi baǵdarlama. Basty sharty - úi kezeginde turýyń mindet. Alaida, «Otbasy» banki respýblikalyq bazada kezekte turǵandarǵa ǵana ipoteka beredi. Osylaisha, jergilikti ákimdikter arqyly kezekte turǵandar arzan ipotekamen úi alý múmkindiginen aiyryldy. Ol azamattardyń qolynda 10, 15 jyl kezekte turdy degen anyqtama bar. Mór basylǵan, basshylyq qoly qoiylǵan. Biraq, Indýstriia ministrligi barlyq azamatty kezekke engizip úlgermesten «Baqytty otbasy» baǵdarlamasyn jariialap jibergen. Indýstriia ministrligi úi kezeginde turǵandardy rettep, júieleýi tiis. Sebebi 2019 jyly úi alǵandardyń ózin bazadan biyl ǵana shyǵarylǵan. Iaǵni, 2 jyl boiy integratsiia jasalmaǵan», - dedi keńes múshesi.
Ýais Ersaiynulynyń atap ótýinshe, úi kezegine halyq arendalyq baspana alý úshin ǵana emes, paiyzy arzan ipoteka alý úshin de turady.
«Halyqqa ózderi jumys istep, ipoteka tólep, úi alýǵa múmkindik berý kerek. Sondai-aq úi kezegine jalǵyzbasty bolyp turatyn adamdarǵa shartty qaita qaraý qajet. Úi kezeginde jalǵyzbasty bolyp turǵan ana turmysqa shyqsa, kezekten shyǵarylady. Úi kezeginen aiyrylmaý úshin olar ekinshi ret turmysqa shyqsa da nekesin zańdastyrmaidy. Osylaisha, jalǵan neke qaptaýda», - dep tolyqtyrdy ol.
