Qazaqstandyqtar áleýmettik jelilerde dúniejúzilik qastandyqtyń «dálelimen» bólisýde. Paidalanýshylar pandemiia tek 2025 jyly aiaqtalady dep jazylǵan Halyqaralyq qaita qurý jáne damý banki men Halyqaralyq damý qaýymdastyǵy qujatynyń skrinshotyn taratýda. Bul - jalǵan, dep habarlaidy Stopfake.kz saity.
Jeli qoldanýshylary aityp otyrǵan qujat bar jáne barshaǵa qoljetimdi.
Onda COVID-19 pandemiiasynyń qashan aiaqtalatyny týraly boljam jasalmaǵan. Is júzinde qujatta «osy jahandyq pandemiiamen jáne onyń saldarymen kúreste HDQ jáne HQDB baǵdarlamasyna qatysýǵa quqyǵy bar elderge» kómek pen qoldaý kórsetý tetikteri sipattalǵan. Bul tizimge Aýǵanstan, Argentina, Kabo-Verde, Kambodja, Kongo Demokratiialyq Respýblikasy, Djibýti, Ekvador, Efiopiia, Gambiia, Gana, Gaiti, Úndistan, Keniia, Qyrǵyz Respýblikasy, Maldiv, Mavritaniia, Mońǵoliia, Pákistan, Paragvai, San-Tome jáne Prinsipi, Senegal, Serra-Leone, Shri-Lanka, Tájikstan, jáne Iemen kirgen.
Iaǵni, qujat pandemiiany josparlaýǵa emes, muqtaj elderge kómek taratýǵa arnalǵan.
Bul baǵdarlama 2020 jyldyń 2 sáýirinen 2025 jyldyń 31 naýryzyna deiingi kezeńge arnalǵan. Iaǵni, osy kezeńde bank COVID-19 pandemiiasy kezinde qoldaýdy qajet etetin elderge barynsha kómek kórsetedi.
Halyqaralyq qaita qurý jáne damý bankiniń pandemiia jariialaýǵa nemese ony uzartýǵa quqyǵy joq. Sonymen qatar, pandemiianyń aiaqtalýy belgili bir organdardyń málimdemesine emes, búkil álemdegi COVID-19 aýrýshańdyq deńgeiine bailanysty.
Demek, jelide tabylǵan qujat Halyqaralyq qaita qurý jáne damý bankiniń qyzmetkerleri qandai da bir qupiia aqparatty biletinin emes, banktiń muqtaj elderge kómek kórsetetinin ǵana dáleldeidi.
