Ulttyq statistika biýrosy «Beinebailanys arqyly halyq sanaǵy ótip jatyr» degen aýdiojazbaǵa pikir bildirdi, dep habarlaidy QazAqparat.
«Tanymal messendjerler arqyly áldebir azamattar «Halyq sanaǵy» aiasynda beinebailanys arqyly saýalnama júrgizip jatqandyǵy týraly aýdiojazba taraýda. Osyǵan bailanysty interviýerler respondenttermen tikelei, júzbe-júz kezdesý arqyly, planshetti qoldana otyryp, sanitarlyq talaptardy saqtap, jaýap alatyndyǵyn habarlaimyz. Qashyqtan, iaǵni telefon, beinebailanys, messendjerler arqyly saýalnama júrgizý qarastyrylmaǵan», - dep málimdedi Ulttyq statistika biýrosynyń baspasóz qyzmeti.
Buǵan deiin aitylǵandai, «Halyq sanaǵy» saýaldaryna jaýap berý úshin birneshe tásil qarastyrylǵan. 1 qyrkúiekten bastap elimizde onlain sanaq bastaldy. 15 qazanǵa deiin respondentter sanaq paraqtaryn sanaq.gov.kz arnaiy saity, E-Gov portalynda tirkelý jáne Aitu mobildi qosymshasyn paidalaný arqyly toltyra alady.
Qazannyń 1-30 aralyǵynda sanaqshylar azamattardy tolyq qamtý maqsatynda úilerdi aralaidy. Úilerdi aralaý kezeńinde interviýerge arnaiy kýálikter men Ulttyq sanaqtyń logotipi beinelengen kók tústi sharf pen sómke beriledi. Kýálikte aýmaqtyq statistika departamenti basshysynyń qolymen jáne mórimen rastalǵan interviýerdiń fotosýreti, tolyq aty-jóni bolady. Kýáliktiń joǵarǵy bóliginde tirkeý nómiri kórsetiledi. Bul nómirdi sanaq.gov.kz saitynda «Interviýerdi izdeý» jolaǵyna engizýge bolady, sodan keiin saitta interviýerdiń derekteri kórsetiledi. Sondai-aq, interviýerdiń jeke basyn 1446 nómirine qońyraý shalý arqyly da tekserýge bolady.
