Ulttyq statistika biýrosynyń basshysy Nurbolat Aidapkelov ortalyq kommýnikatsiialar qyzmetinde ótip jatqan bifingide onlain sanaqqa qatysýshylardyń keibir derekterdi qate toltyrylyp jatqanyna toqtaldy, dep habarlaidy QazAqparat.
«Halyq sanaǵyn ótkizý barysynda azamattardyń birqatar durys emes derekteri anyqtaldy. Sanaqtan ótkender saýalnamalardy toltyrýdyń bastapqy kezeńinde keibir joldar avtomatty túrde toltyrylatynyn baiqaǵan shyǵar. Bul memlekettik derekter qorynan alynǵan tegi, aty, ákesiniń aty, jynysy jáne basqa da aqparat.
Mysaly, tórt er adam derekter bazasynda áiel dep kórsetilgeni belgili boldy. Úsh áiel er adamdar retinde kórsetilgen. Bul adamdarǵa mártebesin ózgertý úshin Halyqqa qyzmet kórsetý ortalyqtaryna júginý usynyldy», - dedi biýro basshysy.
Sondai-aq, ol halyqty onlain sanaqpen keńinen qamtý maqsatynda «sanaq buryshtary» ashylyp jatqanyn eske saldy.
«Internetke jalǵanǵan kompiýteri bar bul buryshtarda aýmaqtyq statistika organdarynyń konsýltanttary jumys isteidi. Úide onlain sanaqtan ótýge múmkindigi joq kez-kelgen osy buryshtarda sanaqtan óte alady. Olar halyqqa qyzmet kórsetý ortalyqtarynyń ǵimarattarynda, «Qazposhta» AQ filialdarynda, bilim berý mekemeleri men oiyn-saýyq ortalyqtarynda uiymdastyryldy. Jalpy, el boiynsha 3100-den astam osyndai buryshtar ashyldy», - dedi Nurbolat Aidapkelov.
