Qazaqstanda halyq sanaǵy aiasynda júrgizilgen naqtylaý jumystary aiaqtaldy, dep habarlaidy QazAqparat Ulttyq statistika biýrosyna silteme jasap.
8 qarasha kúni saǵat 00:00-de «Halyq sanaǵy-2021» aiasynda júrgizilgen naqtylaý jumystary aiaqtaldy.
Negizgi kezeń jáne naqtylaý jumystary qorytyndysy boiynsha saýalnamamen 19,6 millionnan asa respondent qamtyldy.
Bul kezeńde qandai da bir sebeptermen sanaqqa qatysa almaǵan respondentterge arnaiy sanaq.gov.kz saity, e-Gov portaly jáne Aitu mobildi qosymshasy arqyly sanaq saýaldaryn toltyrý múmkindigi berildi.
Búginde ulttyq statistika biýrosy derekterdi óńdeýge kiristi.
Josparǵa sáikes aýqymdy is-sharanyń aldyn ala qorytyndylary aǵymdaǵy jyldyń jeltoqsan aiynda jariialanatyn bolady.
Esterińizge sala keteiik, shara aiasynda elimizde turaqty turyp jatqandardan ózge 12 aidan asa ýaqytqa shetelge issaparmen shyqqandar (sheteldegi diplomatiialyq korpýs pen QR ókildiginiń qyzmetkerleri men olardyń otbasy músheleri), kelisimshart negizinde bir jyldan kem ýaqytqa basqa elge ketken otandastarymyz, ózge memlekette «Bolashaq» baǵdarlamasy aiasynda bilim alyp jatqan stýdentter, ýaqytsha shetelge shyqqan týrister, ýaqytsha (12 aidan az) elimizde júrgen sheteldikter, azamattyǵy joq adamdar men bosqyndar sanaqtan ótýde.
Halyq sanaǵyn ótkizý ádistemesine sáikes, saýalnama aiaqtalǵan soń naqty jáne turǵylyqty halyq sany boiynsha aqparat alynatyn bolady. Bul sanattar neni bildiredi?
«Naqty halyq» degenimiz, sanaq ótkizý kezindegi belgili bir eldi mekendegi adamdardyń sanyn bildiredi. Bul sanatqa turǵylyqty turǵyndarmen qatar, ýaqytsha kelgender men rezident emes tulǵalar jatqyzylady. Iaǵni, munda eldi mekenge qonaqqa, demalýǵa, jumys babymen jáne t. b. maqsatta, sondai-aq, elde ýaqytsha júrgen sheteldikter, azamattyǵy joq adamdar men bosqyndar qamtylady.
«Turǵylyqty halyq» degen sanatta eldi mekende turaqty turyp júrgendermen qatar, ýaqytsha basqa jaqqa shyǵyp ketken azamattar qamtylady. Olardyń qataryna basqa eldi mekenge nemese shetelge týystaryna, eńbek demalysyna, jumys babymen nemese basqa da sebeptermen ýaqytsha ketkender kiredi.
Alǵash ret sanaq saýaldary kezinde qaǵaz tasymaldaǵyshtar tolyǵymen alynyp tastaldy. Respondentterge arnaiy sanaq.gov.kz saity, e-Gov portaly jáne Aitu mobildi qosymshasy arqyly sanaq saýaldaryn toltyrý múmkindigi berildi.
Respondentterdiń 42 protsentten astamy onlain-sanaq fýnktsiiasyn paidalandy.
Aqyly qyzmet kórsetý týraly shartqa sáikes jumys istegen interviýerler planshetterdi paidalandy.
