Túrkistan oblysy Sairam aýdany Qarabulaq aýylynda Abdazimovtar otbasy halyq sanaǵynan onlain rejimde ótti. Bul otbasy 22 adamnan turady, dep habarlaidy QazAqparat.
«Meniń jeti balam bar-tórt ul, úsh qyz. Qazir úide barlyǵy-22 adam. Biz barlyq 22 adamǵa sanaqtan onlain óttik jáne barlyq otandastarymyzdy sanaqtan onlain ótýge shaqyramyz», - dedi otaǵasy Abdýlakim Abdazimov.
Aqsaqalmen bir úide onyń uldary jubailarymen birge jáne 12 nemeresi turady. Qyzdary turmysqa shyǵyp, bólek turady, olar da sanaqtan ákeleri siiaqty onlain-formatta ótken.
14 qyrkúiek saǵat 9:00-degi jaǵdai boiynsha 2 465 217 respondent onlain sanaqtan ótti. Olardyń 2123896-si sanaq.gov.kz saitynda, 244097 adam Egov portalynda tirkelý arqyly jaýap berse, 97224 adam sanaqqa Aitu qosymshasy arqyly qatysty.
13 kúnniń qorytyndysymen Almaty oblysy alda. Munda 252149 turǵyn sanaqtan ótkeni jaily habarlama alǵan.
Onlain sanaqtan ótken taǵy 224842 adam Almaty qalasynda tirkelgen. Úzdik úshtikti Qyzylorda oblysy túiindedi.
Munda 204546 adam sanaq saýaldaryna jaýap berdi.
Bul kórsetkish boiynsha ázirge sońǵy eki oryndy Mańǵystaý jáne Atyraý oblystary enshilep tur. Bul óńirlerde sáikesinshe 56926 jáne 53781 adam sanaqtan ótipti.
Al, jergilikti halyq sanyna shaqqandaǵy sanaqtan ótkenderdiń úlesi boiynsha Qyzylorda oblysy alda tur.
Munda azamattardyń 24,9% saýaldarǵa jaýap bergen (1 tamyzdaǵy jaǵdai boiynsha óńirde 823052 adam tirkelgen).
Bul kórsetkish boiynsha Batys Qazaqstan oblysy ekinshi orynda.
Munda turǵyndardyń 19,8% búginge deiin sanaqtan onlain rejimde ótken (1 tamyzdaǵy jaǵdai boiynsha óńirde 749754 adam tirkelgen).
Ulttyq statistika biýrosy azamattardyń belsendiligi úshin alǵys aita otyryp, sanaqty onlain ótýge shaqyrady.
Sanaq.gov.kz saity 15 qazanǵa deiin táýlik boiy qoljetimdi bolmaq. Onlain sanaqtan ótpegender 1-30 qazan aralyǵynda interviýerlerdiń saýaldaryna jaýap bere alady.
Barlyq saýaldar boiynsha 1446 bailanys ortalyǵyna habarlasýǵa bolady. Qońyraý shalý tegin.
