Foto: «AMANAT» partiiasy
«AMANAT» partiiasynyń kezekten tys sezinde burynǵy Oqý-aǵartý ministri, bilim salasynyń janashyry Ashat Aimaǵambetov sóz sóilep, óziniń tájiribesi týraly aityp berdi, dep habarlaidy Azattyq Ruhy.
«Jaqynda meni Astana qalasyndaǵy mekteptiń oqýshylarymen kezdesýge shaqyrdy. Kezdesýde 7-synyptyń oqýshysy kútpegen jerden qyzyqty suraq qoidy. «Naýryz aiynda sailaý bolady. Jeńiske jetken depýtattar elimizde ne ózgerte alady?» dep surady ol», - dedi Aimaǵambetov.
Eks-ministr oqýshyǵa óz basynan ótken bir oqiǵany aityp bergenin jetkizdi.
«21 jasymda jergilikti máslihatqa sailaýǵa túsemin dep sheshim qabyldadym. Jas bolsam da, eshqandai qoldaýsyz osyndai úlken dodaǵa tústim. Árine, kóp adam senbedi. 11 qarsylasym boldy. Olardyń qatarynda keshegi depýtat, myqty kásipkerler, qalalyq ardagerler keńesiniń tóraǵasy, basqa da bilikti, elge tanymal azamattar boldy. Biraq erik-jigerdiń, senimniń, adal eńbektiń arqasynda sol sailaýda jeńip shyqtym.
Aldymyzda úlken josparlar boldy. Jaryq, avtoturaq siiaqty birqatar máseleni sheshtim. Munyń bári - kúndelikti másele. Biraq júieli, úlken, iri máselelerdi sheshýge múmkindik bolmady. Óitkeni men jalǵyz boldym. Jalǵyz depýtat – jalǵyz daýys.
Árine, minberge shyǵyp synaisyń, depýtattyq saýaldardy jiberesiń. Biraq odan naqty, júieli máseleler sheshimin tappady. Sondyqtan ol kezde men eki máseleni túsindim. Birinshisi - jalǵyz depýtat úlken máselelerdi jalǵyz sheshe almaidy. Ekinshi másele - elimizde úlken saiasi transformatsiia bolmasa, onda bul bastamalar beker. Endi qazirgi ýaqytta elimizde úlken ózgerister bolyp jatyr. Sol ózgeristerdiń zańdy jalǵasy retinde osy sailaýdy kóremin. Bul sailaý elimizdi túbegeili ózgertýge jańa múmkindikter beredi dep oilaimyn», - dep túsindirdi eks-ministr sezde.
Aimaǵambetov ózgerister bolýy úshin senim bolýy kerek ekenin aitady.
«Ózgerister týraly kóp aitamyz. Biraq ózgeris bolýy úshin bizge ne kerek? Ol úshin senim paida bolýy kerek. Al senim paida bolýy úshin naqty ister kerek. Halqymyz túrli bos uran men josparlardan sharshady. Naqty ispen dáleldeý kerek», - dep tolyqtyrdy ol sózin.
