Reseidegi túrki halyqtarynyń ómiri jaily film túsirmek bolǵan Stambýl ýniversitetiniń magistranty, Qazaqstan azamaty Nazgúl Kenjetai Reseidiń Hakasiia aimaǵynda júr. 2021 jyl.
Reseidiń Hakasiia aimaǵynda ustalǵan Qazaqstan azamaty Nazgúl Kenjetai ózin advokatymen bailanystyrmai, alty kún buryn sottap jibergenin aitty. Bul aqparatty advokaty da rastady. Qorǵaý taraby deportatsiia týraly sheshimge shaǵym túsirmek, dep habarlaidy Azattyq radiosy.
Stambýl ýniversitetiniń magistranty, Qazaqstan azamaty Nazgúl Kenjetaidyń túrki halyqtary jaily film túsirý úshin Reseidiń Hakasiia aimaǵyna baryp, sol jaqta ustalǵany týraly aqparat bir kún buryn taraǵan. Onymen birge túrik basylymynyń operatory Emin Karachak ta ustalǵan. Resei jaǵy olardy jýrnalist bola tura akkreditatsiiasyz jumys istedi dep aiyptap, deportatsiia týraly sheshim shyǵarǵan. Jaýapkerler munymen kelispeidi. Jýrnalisterdiń zattary kámpeskelenip, túsirgen barlyq materialdary joiylǵan. Qazir ekeýi Abakandaǵy ýaqytsha qamaý ornynda otyr, jaqyn arada deportatsiialanady.
"Apyr-topyr, ne bolyp jatqanyn aitpai, telefondardy ádeii bermei, advokatqa bailanysqa ruqsat bermei, sotqa apardy. Sýdia Zarýbin bizdi tyńdamai formalnyi sot ótkizip, deportatsiia týraly sheshim shyǵardy" dedi tergeý izoliatorynan messenjer arqyly Azattyq tilshisine jaýap bergen Nazgúl Kenjetai.
Onyń advokaty Aiaz Tiýndeshev qorǵaý tarabynda olardyń ustalýyna qatysty suraq kóp deidi.
"Bizdiń oiymyzsha, olardy múlde zańsyz ustaǵan, sebebi birinshi kezekte olarǵa advokatty jibermegen. Telefondaryn tartyp alǵan. Olarǵa qai jerde otyrǵandyqtaryn aitpaǵan. Olar maǵan sotta otyrmyz dep habarlaǵan kezde men tipti qai sotqa bararyn bilmedim" deidi advokat. Qorǵaý taraby deportatsiia týraly sheshimdi apelliatsiiaǵa bermekshi.
Al Nazgúl Kenjetaidyń aǵasy ǵalym Dosai Kenjetai Qazaqstannyń Reseidegi konsýldyǵy izoliatordaǵy Nazgúl Kenjetaimen kezdesip shyqqanyn aitty. "Olar bári jaqsy bolady dep otyr" dedi ol.
Dosai Kenjetai alǵashynda Resei FSB-nan qaryndasy týraly aqparat suraǵan kezde "habary joǵyn" aitqanmen keiin rastaǵan. Onyń aitýynsha, magistratýrada oqityn Nazgúl Kenjetaidyń diplomdyq taqyryby – quryp bara jatqan az túrki halyqtarynyń bolmysy týraly zertteý. Nazgúl Eminmen birge buǵan deiin Iakýtiiaǵa baryp, video túsirgen. Aqparatqa qaraǵanda, ol jerde de eki tilshi "Reseige kirý erejesin buzdy" degen aiyppen aiyppul alǵan.
Túriktiń memlekettik agenttiginiń jazýynsha, Resei aqparat quraldary "Kenjetai men Karachak tyńshylyqpen ainalysyp, Reseige qarsy úgit-nasihat júrgizdi, túrki halyqtary Reseide nashar jaǵdaida ómir súrip jatyr dep kórsetkisi keledi jáne islamdy taratyp júr" dep negizsiz aiyptap, aqparat taratqan. Alaida Hakasiiadaǵy túrkiler "túrik jýrnalisteriniń qiyn jaǵdaida qamaýda otyrǵanyn kórip, olarǵa tamaq pen sý aparyp jatyr" dep jazdy.
Copyright (c) 2013. RFE/RL, Inc. Reprinted with the permission of Radio Free Europe/Radio Liberty, 1201 Connecticut Ave., N.W. Washington DC 20036.
