Foto: ashyq derekkóz
Astanada tanysý saittary arqyly er adamdardy aldap, aqsha jinaǵan úsh qyzǵa qatysty sot úkimi shyqty. Bul týraly qala prokýratýrasy habarlady.
Tergeý málimetinshe, kúdiktiler internettegi tanysý platformalary arqyly er adamdarmen bailanys ornatyp, olardy «romantikalyq kezdesý» ótkizýge kóndirgen. Keiin jalǵa alynǵan páterde birge ýaqyt ótkizýdi usynyp, páterdi bir táýlikke jalǵa alý qajet ekenin aitqan.
Osy maqsatta olar internette páter jalǵa berý týraly jalǵan habarlandyrýlar ornalastyryp, tartymdy interer fotosýretterin jariialaǵan. Jábirlenýshiler kórsetilgen esepshottarǵa aldyn ala aqsha aýdarǵan.
Alaiaqtyq shema saldarynan 45-ten astam adam jábirlenip, jalpy shamamen 620 myń teńge shyǵyn keltirilgen.
Aqshany alǵannan keiin kúdiktiler jábirlenýshilermen bailanysyn úzip, olardyń nómirlerin buǵattap otyrǵan.
Sot úkimimen aiyptalýshylardyń kinásin moiyndaýy jáne keltirilgen zalaldy óteýi eskerildi. Nátijesinde úsh qyzǵa 3 jyldan 3 jyl 6 aiǵa deiin bas bostandyǵyn shekteý jazasy taǵaiyndalyp, probatsiialyq baqylaý belgilendi. Sondai-aq olar májbúrli eńbekke tartyldy.
Úkim zańdy kúshine endi.
Qala prokýratýrasy azamattarǵa internet arqyly kelisim jasarda saq bolýdy, aqparatty aldyn ala teksermei qarjy aýdarmaýdy eskertedi.
Aita keteiik, buǵan deiin Bas prokýratýra 8 naýryz qarsańynda internet-alaiaqtyq faktileri jiileitinin eskertken bolatyn.
