«KEGOC» kompaniiasynyń uttyq dispetcherlik ortalyǵynyń bas dispetcheri Bekjan Muqatov birneshe óńirde elektr energiiasynyń jeliden ajyraý sebepteri týraly aitty, dep habarlaidy QazAqparat.
«Qazaqstan Respýblikasynyń Biryńǵai elektr energetikalyq júiesi Resei Federatsiiasynyń biryńǵai energiia júiesimen jáne Ortalyq Aziianyń birikken energiia júielerimen qanattasyp jumys isteidi. Elimizde elektr energiiasyn tutynýdyń eń kóp mólsheri qazir shamamen 15 myń MVt bolyp otyr. Elektr stantsiialarynda josparǵa sáikes jóndeý jumystary júrgizilýde. 8 qarashada «Moinaq» GES-indegi eki blok iske qosyldy. Keshe ǵana respýblika tutynýshylarynyń qajettiligin barynsha qanaǵattandyrý úshin «Jambyl» GRES-inde qýaty 200 MVt bolatyn energetikalyq blok ta iske qosyldy. Jyl basynan beri respýblika boiynsha elektr tutyný kólemi ótken jylmen salystyrǵanda 7,2% ósti. Jalpy, «KEGOC» AQ jelilerden energiiany ajyratqan joq. Tutynýshylar elektr energiiasymen tolyq kólemde qamtamasyz etiledi. Qazir jaǵdai qalypty», - dedi Bekjan Muqatov brifingide.
Bas dispetcher jýrnalisterdiń suraqtaryna jaýap bere otyryp, qazan-qarasha ailarynda tirkelgen jospardan tys aǵyndar energiia kózderinen qýatty jetkiliksiz mólsherde satyp alý saldarynan týyndaǵanyn túsindirdi.
«Elektr energiiasynyń kelisimsharttan tys qabyldanýyn azaitý úshin aimaqtyq salalyq kompaniialarǵa tiisti buiryqtar berildi. Onyń ishinde, birneshe oblystyń, atap aitqanda, Qazaqstannyń ońtústigindegi tutynýshylardyń ajyratylýyna alyp kelýi múmkin iri júieli apattardyń aldyn alý úshin naqty sheshimder qabyldandy», - dedi KEGOC ókili.
Sonymen qatar, ol tutynýshylar energiiany is júzinde tutynatyn kólemde satyp alýy tiis ekenin atap ótti.
«Bizde elektr energiiasynyń óndiris kólemin arttyrýǵa qajet rezervter Jambyl GRES-inde bar. Tutynýshylar qajetti kólemdi aldyn ala satyp alsa, jospardan tys ajyratýǵa tap kelmeidi. «Qazaqstan elektr energiiasy men qýat naryǵynyń operatory» AQ bazasynda saýda alańyn uiymdastyrdyq. Qazaqstannyń elektr stantsiialary sol jerde rezervtegi qosymsha qýattardy satady», - dedi Bekjan Muqatov.
