Túrkistan oblysynyń politseileri joǵalǵan 3 jasar balany taýyp, anasymen qaýyshtyrdy, dep habarlaidy "Ult aqparat" oblystyq politsiia departamentine silteme jasap.
Qazyǵurt aýdandyq politsiia bólimine jergilikti turǵyn aryzdanyp, 3 jasar ulynyń joǵalyp ketkenin aitqan.
Sodan soń tártip saqshylary habar jetisimen jolǵa shyǵyp, oqiǵa ornyna keldi.
Balanyń anasynan barlyq mán-jaidy surap, barýy múmkin degen aimaqtardyń barlyǵyn tekserdi.
Týǵan-týys, kórshileriniń úiine baryp, jan-jaqty izdestirý jumystaryn júrgizdi.
Nátijesinde turǵylyqty úiinen bir kóshe beriden joǵalǵan búldirshindi taýyp, anasyna aman-esen tabystady.
Belgili bolǵandai anasy úlken qyzy men 3 jasar ulyn úiine qaldyryp, bazarǵa shyǵyp ketken. Arada birer saǵat ótken soń úiine kelgende ulynyń joqtyǵyn kórgen.
Osylaisha ony óz betinshe izdegen. Alaida esh nátije shyqpaǵan soń tártip saqshylaryna habar bergen. Al politsiia qyzmetkerleri az ýaqyttyń ishinde joǵalǵan balany tapty.
«Bazarǵa azyq-túlik alýǵa shyǵyp ketken bolatynmyn. Ulymdy qyzymmen birge qaldyrǵan edim. Bazardan kelsem balam úiden shyǵyp ketipti. Ózim izdep tappai, politsiia qyzmetkerlerine habarlastym. Olar birden taýyp berdi. Tártip saqshylaryna úlken raqmet!» - dep, analyq alǵysyn jaýdyrdy.
Túrkistan oblysynyń politseileri turǵyndarǵa balalaryn qaraýsyz qaldyrmaý kerektigin eskertedi.
