«Qazposhta» AQ jumysqa qabyldaý men memlekettik satyp alý jumystaryn avtomattandyrady, dep habarlaidy "Ult aqparat".
Bul týraly «Qazposhta» AQ basqarma tóraǵasy Sáken Sársenov Feisbýktegi «Antikor Life» suhbatynda aityp berdi.
«Birneshe jyl buryn «Qazposhtada» ǵana emes, birneshe uiymdarda jumysqa ornalasý boiynsha qiyndyqtar kezdesetin. Endi jumysqa qabyldaý avtomattandyrylǵan protseste ótedi jáne «ortańǵy býyn» esh sheshimge yqpal ete almaidy. Bul – birinshi mindet. Ekinshiden, memlekettik satyp alý júiesi de elektrondy júiege aýystyrylady. Barlyq maquldaý jáne sheshim shyǵarý protsesteri avtomattandyrylady jáne bul protsesti jyldan-jylǵa jaqsartyp kelemiz», - dedi S. Sársenov.
«Qazposhta» basshysy birneshe jyl buryn shalǵai aýyldarda poshta qyzmetkerleriniń zeinetaqyny turǵyndarǵa tolyq taratpaǵany týraly oqiǵa bolǵanyn atap ótti. Bul másele de avtomattandyrý jolymen sheshilmek. Sońǵy jyldary zeinetkerlerdiń basym bóligi bank kartalary arqyly tólemaqy alatyn boldy. Endi shamamen 500 myń zeinetker ǵana zeinetaqyny qolma-qol alyp keledi. Munda da ádiletsizdikke jol bermeý úshin poshta qyzmetkerine arnaiy qosymshasy bar uialy telefon berildi. Poshta qyzmetkeri taratqan zeinetaqy kólemin sol qosymshada kórsetip otyrýy tiis. Ázirge zeinetkerler tarapynan esh shaǵym túspedi.
Aita keteiik, QR Sybailas jemqorlyqqa qarsy is-qimyl agenttigi pen «Qazposhta» AQ sybailas jemqorlyqqa qarsy kúreske arnalǵan poshta markalaryn satylymǵa shyǵardy.
