Qazaqstandyqtar Jelide 2010-2021 jyldar aralyǵynda jumys istemegen nemese tabysy tómen adamdar memlekettik sýbsidiia ala alady degen habarlama taratyp jatyr, - dep habarlaidy Tengrinews.kz tilshisi Stopfake.kz basylymyna silteme jasap.
Telegram messendjerinde 2010 jyldan 2021 jylǵa deiingi kezeńde jumys istemegen nemese tabysy tómen adamdar memlekettik sýbsidiialar ala alady degen aqparat tarady. Habarlamada onyń mólsheri 85 400 teńge ekeni jáne úsh ai ishinde tólenetini kórsetilgen.
Bul aqparatty Qazaqstan Eńbek jáne halyqty áleýmettik qorǵaý ministrligi joqqa shyǵardy.
"Messendjerler men áleýmettik jelilerde taraǵan tabysy tómen jáne jumyssyz turǵyndar 85 400 teńge mólsherinde memlekettik ekonomikalyq sýbsidiialarǵa ótinim bere alatyny týraly aqparat shyndyqqa janaspaidy. Eńbek jáne halyqty áleýmettik qorǵaý ministrligi Qazaqstanda mundai sýbsidiialar joq ekenin habarlaidy", - delingen vedomstvo jaýabynda.
Sondai-aq, ministrlik kórineý jalǵan aqparat taratqany úshin jaýapkershilik júkteletini týraly eske saldy.
Qaznette memlekettik tólemder men jeńildikter týraly habarlamalar birinshi ret taratylyp otyrǵan joq. Buǵan deiin áleýmettik jelilerde 50 myń teńge mólsherinde áleýmettik járdemaqy rásimdeýge kómektesýge ýáde beretin paraqshalar paida bolǵany habarlanǵan edi. Ol úshin esepshotqa aqsha aýdarý kerek. Ótinish berýshiden qyzmet úshin 3120 teńge suralady.
