Qaznet qoldanýshylaryn kóshedegi jasóspirimderdiń qylyǵy ashýlandyrdy. Boljam boiynsha, videodaǵy qyzdardyń biri esirtki qoldanǵan, - dep habarlaidy Tengrinews.kz.
Áleýmettik jelilerde bir top jasóspirim qyz túsirilgen video jariialandy. Kadrlardan olardyń biri jerde jylap, tura almai otyrǵanyn kórýge bolady. Janyndaǵy basqa qyzdar onyń qylyǵyn aityp, urysyp jatyr. Olardyń aitýynsha, qyz mef iiskegen (tez psihikalyq táýeldilik týdyratyn sintetikalyq preparat "mefedron" - avt.eskert.).
"Men buǵan tańdanbaimyn. Ókinishke qarai, bul elimizde úirenshikti jaǵdaiǵa ainaldy. 16 jastaǵy qyzdar mas kúide, kóshede jatady. Saldary ókinishti jaǵdaiǵa ákelýi múmkin. Artyq dozadan ólim nemese zorlaý. Sebebi, bul jaǵdaida olar qarsylyq kórsetip, ózin ustai almaidy. Bul videodan anyq kórinip tur. Ata-anasy qaida qarap otyr? Balalary ne istep júrgeni báribir me? Baqylaý qaida?
Men taǵy da barlyq politsiia qyzmetkerin, ishki ister ministrin sintetikalyq esirtkige qarsy kúresti kúsheitýge jáne naqty nátije kórsetýge shaqyramyn. Ata-ana, balalaryńyzdy baqylańyz. Ne istep júr, dostary kim, esirtki qabyldaǵanda bala ózin qalai ustaitynyn bilip, baqylańyz", - dep jazdy basylym avtory.
Videoǵa qatysty túrli pikir jazylǵan. Paidalanýshylar quqyq qorǵaý organdaryna esirtki qylmysyna qarsy kúresti kúsheitý qajet ekenin jazǵan. Basqalary ata-ana balanyń ómirin baqylaýdy kúsheitýi kerek dep sanaidy.
Nazar aýdaryńyz, videoda dóreki sózder aitylǵan!
Sonymen qatar, ishki ister ministrligi bul videonyń keiipkerleri izdestirilip jatqanyn habarlap otyr. Alaida, ázirge politsiia qyzmetkerleri olardyń jeke basyn anyqtap úlgermegen.
"Áleýmettik jelilerde kámeletke tolmaǵan qyzdyń psihikalyq belsendi zatty qabyldaýynyń saldary túsirilgen video jariialandy. Ókinishke qarai, ázirge oqiǵaǵa qatysýshylardy anyqtaý múmkin bolmady. Politsiiaǵa jáne densaýlyq saqtaý organdaryna osy fakt boiynsha jasóspirimderdiń nemese olardyń ókilderiniń ótinishteri de bolǵan joq", - dedi vedomstvodaǵylar.
IIM sintetikalyq esirtkiler óndirisi qarapaiymdylyǵy men arzandyǵyna bailanysty "qazirgi álemniń qasiretine ainalady" dep atap ótti.
Politseiler esirtki qylmysy úshin qylmystyq jaýapkershilik 14 jastan bastalatynyn eske saldy. Sondyqtan qazirgi zamanǵy esirtkiler týraly, sondai-aq esirtkiniń zańsyz ainalymyna qatysýdyń quqyqtyq saldary týraly tolyq aqparatty IIM Esirtki qylmysyna qarsy is-qimyl departamentiniń YouTube-arnasynan kóre alasyz.
