"Qazgidromet" RMK sinoptikteri qazanǵa arnalǵan aýa raiy boljamyn usyndy, - dep habarlaidy Tengrinews.kz.
Qazanda ortasha aýa temperatýrasy eldiń kóp bóliginde qalypty bolady dep kútiledi. Mańǵystaý, Atyraý, Qyzylorda, Batys Qazaqstan, Aqtóbe oblystarynyń basym bóliginde, Túrkistan oblysynyń batys jartysynda, Qaraǵandy oblysynyń ońtústik-batysynda, Qostanai oblysynyń ońtústiginde aýa temperatýrasy normadan 1 gradýsqa joǵary bolady.
"Respýblikanyń basym bóliginde jaýyn-shashyn mólsheri normaǵa jýyq bolady dep boljanǵan. Jaýyn-shashyn Mańǵystaý, Qyzylorda oblystarynda, Atyraý, Aqtóbe, Túrkistan, Jambyl, Almaty oblystarynyń basym bóliginde, Qostanai oblysynyń ońtústik jartysynda, Qaraǵandy oblysynyń batysy men ońtústiginde, Shyǵys Qazaqstan oblysynyń ońtústik-batysynda normadan az bolady", - dedi "Qazgidromet" RMK qyzmetkerleri.
Boljamǵa sáikes, Reseidiń Eýropalyq aýmaǵy arqyly ótetin Skandinaviia men Barents teńizi aýdandarynan sýyq antitsiklon qazannyń basynda respýblikanyń batys jartysynda aýa raiyn qalyptastyrady.
"Qazaqstannyń soltústiginde, shyǵysynda, ońtústik-shyǵysynda jáne ortalyǵynda, kerisinshe, batys jáne ońtústik tsiklondardyń jyrasynan jáne belsendi frontal bólikterdiń ótýine bailanysty jaýyn-shashyn (jańbyr, qar, tuman jáne kóktaiǵaq qubylystary, soltústikte jeldiń kúsheiýi, tómen burqasyn) boljanady, Qazaqstannyń taýly aýdandarynda qatty jaýyn-shashyn bolýy múmkin", - dep túsindirdi meteorologiialyq qyzmet ókilderi.
Sinoptikter málimetinshe, aidyń birinshi onkúndiginde soltústik-batys antitsiklonnyń batys óńirlerge ótýi áserinen aýa temperatýrasy túnde 1-3 gradýsqa deiin, kúndiz +10+15 gradýsqa deiin tómendeidi.
Eldiń ońtústik jáne ońtústik-shyǵysynda birinshi onkúndiktiń ortasynda túnde 1-3 gradýsqa deiin, kúndiz +5+13 gradýsqa deiin sýytady.
Qazannyń ekinshi jáne úshinshi onkúndikterinde jekelegen kúnderi jylýdyń qysqa merzimdi tolqyny kútiledi, kúndiz aýa +13+18 gradýsqa deiin, respýblikanyń ońtústik-batysynda, ońtústiginde, ońtústik-shyǵysynda +19+25 gradýsqa deiin jylynady.
Qazaqstannyń soltústik jartysynda aýa temperatýrasy túnde-4-10 gradýsqa deiin, kúndiz -2+3 gradýsqa deiin, ońtústik jartysynda - túnde -5+5 gradýsqa deiin, kúndiz +7+12 gradýsqa deiin tómendeýi boljanǵan.
