Kelesi aidan múgedek adamdar jańa járdemaqy ala bastaidy. Bul týraly QR Eńbek jáne halyqty áleýmettik qorǵaý vitse-ministri Erlan Áýkenov aitty, dep habarlaidy QazAqparat.
«2019 jyly Úkimet qaýlysymen múgedek adamdardyń quqyqtaryn qamtamasyz etý jáne turmys sapasyn jaqsartý jónindegi ulttyq jospar qabyldandy. Ulttyq jospar múgedektigi bar adamdardy áleýmettik qorǵaý salasyndaǵy úilestirý keńesiniń, jurtshylyqtyń qatysýymen ázirlendi jáne 7 baǵytty qamtidy, 64 is-sharadan turady, ony 7 (jeti) ortalyq memlekettik organ iske asyrady. Ulttyq Jospardy iske asyrý úshin Eńbek ministrligi múgedektigi bar adamdardyń quqyqtary men áleýmettik qorǵalýyn qamtamasyz etý salasyndaǵy zańnamany jetildirýde», - dedi ol Ortalyq kommýnikatsiialar qyzmetindegi baspasóz máslihatynda.
Onyń atap ótýinshe, sońǵy eki jylda osy baǵytta 1 Kodekske, 2 Zańǵa, Prezidenttiń 1 Jarlyǵyna, Úkimettiń 2 qaýlysyna, Ulttyq bank basqarmasynyń 1 qaýlysyna, ministrlikterdiń 12 buiryǵyna ózgerister engizý jáne ázirleý boiynsha jumys júrgizildi.
«Ótken beisenbi, 23 qyrkúiekte Parlament Senatynyń jalpy otyrysynda «Qazaqstan Respýblikasynyń keibir zańnamalyq aktilerine azamattardyń jekelegen sanattaryn áleýmettik qorǵaý máseleleri boiynsha ózgerister men tolyqtyrýlar engizý týraly» Zań qaralyp, maquldandy. Jaqyn arada zań Memleket basshysyna engiziledi, is júzinde jýyrda onyń qabyldanýyn kútemiz. Zań jobasy boiynsha jumys 2019 jyly bastalǵan bolatyn», - dedi vitse-ministr.
Vitse-ministrdiń dereginshe, zańda 19 túbegeili túzetý qamtylǵan jáne 16 zańnamalyq aktige ózgertýler engizýdi kózdeidi.
«Zań normalaryn júzege asyrý úshin osy jáne kelesi jylǵa 55 mlrd teńge bólindi. Kelesi aidan bastap múgedek adamdar jáne múgedek balalardy tárbielep otyrǵan otbasylary jańa járdemaqy ala bastaidy ári jańashyldyqty sezinedi», - dedi Erlan Áýkenov.
