Qalyń kópshilikke «Tailaq» esimimen tanylǵan «Taqiialy perishte» filminiń bas keiipkeri ómirden ozdy, - dep habarlaidy "Ult aqparat".
Iisi qazaq súisinip kóretin «Taqiialy perishte» filminiń bas keiipkeri, aty ańyzǵa ainalǵan akter, Qazaqstan Respýblikasynyń Mádeniet qairatkeri, Almaty oblysynyń Qurmetti azamaty Álimǵazy Raiymbekov ómirden ozdy.
Álimǵazy Sumaǵululy 1936 jyly 1 jeltoqsanda Almaty oblysynda dúniege kelgen. Alǵashqy eńbek jolyn aýylda júrgizýshi bolyp bastaǵan. 1965 jyly alǵashqy «Án qanatynda» filminiń sporttyq is-sharalaryna shaqyrtý alady. 1966 jyly «Qily kezeń» filmine túsedi.
1968 jyly qazaq kinosynyń altyn qorynan oiyp turyp oryn alǵan «Taqiialy perishte» (rejisseri Sháken Aimanov) kinofilmindegi Tailaqtyń rólin somdaidy. Osy kezden bastap jurtshylyqqa keńinen tanylady.
Budan bólek, «Kógildir taksi», «Qan men ter» sekildi onnan asa kinofilmge túsken. Birneshe merekelik medal men Qurmet gramotalaryn alǵan. Almaty oblysy Kóksý aýdanynyń da Qurmetti azamaty.
Álimǵazy Raiymbekov ómiriniń sońyna deiin qoǵamdyq jumystarǵa belsene aralasyp, jas urpaqty tárbieleýge úlken úles qosty. Kez kelgen is-sharalarda aq batasyn berip, el amandyǵyn tilep júretin, nemere-shóberelerine úlgili azamat edi.
