QR Tuńǵysh Prezidenti – Elbasynyń qory úzdik qazaqtildi internet-saitty anyqtaý boiynsha baiqaýǵa ótinimderdi qabyldaýdy bastady, dep habarlaidy "Ult aqparat".
Jyl saiynǵy baiqaýdy uiymdastyrýshy – QR Tuńǵysh Prezidenti – Elbasynyń qory janyndaǵy Memlekettik tildi damytý qory.
Biyl ol tórtinshi ret ótkizilgeli otyr. Ótken úsh jyl qorytyndysy boiynsha 25 otandyq qazaqtildi sait baiqaý laýreaty atanyp, aqshalai syilyqqa ie boldy.
Jeńimpazdar kelesi nominatsiialar boiynsha anyqtalady:
«Ótkir til» — qazaq tilin jáne ulttyq qundylyqtardy nasihattaityn úzdik sait;
«Rýhani azyq» – qazaq ádebieti men mádenietin nasihattaityn úzdik sait;
«Tereń izdenis» — qazaq eliniń tarihyn nasihattaityn úzdik sait;
«Shynaiy ómir» – qoǵamdaǵy ózekti máselelerdi talqylaityn úzdik sait;
«Sport tynysy» — salaýatty ómir salty men sportty nasihattaityn úzdik sait;
«Bilim bulaǵy» — bilim beretin úzdik sait;
«Jastar álemi» — jastarǵa arnalǵan úzdik sait;
«Aimaq ainasy» — úzdik aimaqtyq sait;
«Balalarǵa bazarlyq» — balalarǵa arnalǵan úzdik sait;
«Oiyn-saýyq» — úzdik oiyn-saýyq saity.
Ár nominatsiia boiynsha úzdik saitqa 385 myń teńge kóleminde aqshalai syilyq tapsyrylady. Baiqaý qorytyndysy jyl sońynda shyǵarylady.
Baiqaý jeńimpazdaryn belgili qoǵam qairatkerleri, qalamger-jýrnalister jáne baiqaý quryltaishylarynan jasaqtalǵan qazylar alqasy anyqtaidy. Saittyń mazmuny, qyzmet baǵyty, interaktivtiligi, kórkemdik jaǵy, ideia ereksheligi, qoǵamǵa jalpy áseri – qazylar alqasy basshylyqqa alatyn negizgi ólshemder.
«Baiqaýǵa ǵalamtor keńistigindegi tájiribesi keminde bir jyldy quraityn, qazaq tilinde aqparat taratatyn jáne qyzmet túri Qazaqstan Respýblikasynyń qoldanystaǵy zańnamasyna qaishy kelmeitin kez kelgen úkimettik emes, táýelsiz qoǵamdyq sait qatysa alady. Baiqaýǵa memlekettik organdardyń, sheteldik uiymdardyń, buqaralyq aqparat quraldarynyń elektrondyq nusqalary (gazet, tv, radio) qatysa almaidy. Baiqaý erejesimen Qazaqstan Respýblikasy Tuńǵysh Prezidenti – Elbasy Qorynyń www.fpp.kz jáne Memlekettik tildi damytý qorynyń www.qazaq-found.kz saitynan tanysýǵa bolady», - delingen qor aqparatynda.
Ótinimder biylǵy 20 qyrkúiekten 20 qarashaǵa deiin qabyldanady.
