Densaýlyq saqtaý ministri Aleksei Tsoi Úkimet otyrysynda eldegi epidemiologiialyq jaǵdaidy baiandady, dep habarlaidy QazAqparat.
«Epidemiologiialyq ahýaldy baǵalaý matritsasyna sáikes, Qazaqstan Respýblikasy 26 maýsymnan beri «qyzyl» aimaqta tur. Túrkistan oblysynan basqa óńirlerdiń bári «qyzyl» aimaqta. 3 tamyzdaǵy jaǵdai boiynsha, respýblikadaǵy infektsiialyq tósek-orynnyń 56 paiyzynda, reanimatsiialyq tósek-orynnyń 44 paiyzynda naýqastar jatyr. Ásirese, juqpaly aýrý emhanalaryndaǵy eń kóp naýqas Nur-Sultan, Shymkent qalalarynda, jansaqtaý bólimindegi naýqastar Aqmola, Atyraý, Mańǵystaý oblystary men Nur-Sultan qalasynda kóp tirkelgen», - deidi ministr.
Densaýlyq saqtaý ministrligi óz qyzmetkerleri men meditsinalyq JOO professorlyq-oqytýshylyq quramymen birge 10 aimaqqa saparlap barǵan jáne KVI naýqastaryn kútý boiynsha praktikalyq jáne ádistemelik kómek kórsetken.
«Óńirlerdegi ahýalǵa egjei-tegjeili taldaý júrgizilip, jaǵdaidy turaqtandyrý úshin naqty usynystar berildi. Statsionarlarǵa júktemeni baǵalaý matritsasyna sáikes, «qoiý qyzyl» aimaqta – qaýip joǵary aimaqta tórt óńir bar, olar - Almaty, Shymkent qalalary, Atyraý jáne Qaraǵandy oblystary. Ondaǵy tósek-orynnyń aptalyq qamtylý kórsetkishi 100 myń turǵynǵa shaqqanda 200-den asady jáne odan da joǵary», - dedi Tsoi.
