Atmosferaǵa ziian zattardyń jartysynan astamy elimizdiń eki óńiri - Pavlodar jáne Qaraǵandy oblystaryndaǵy kásiporyndardan shyǵady, - dep habarlaidy Tengrinews.kz tilshisi Energyprom.kz saityna silteme jasap.
2021 jyly Qazaqstandaǵy barlyq statsionarlyq lastaýshy kózderden shyǵatyn ziian zattardyń jalpy kólemi 34,3 million tonna bolǵan, bul 2020 jylmen salystyrǵanda 3,3 paiyzǵa az. 31,9 million tonna ziian shyǵaryndy zalalsyzdandyrylǵan. 2021 jyly atmosferaǵa shyqqan lastaýshy zattar kólemi 2,4 million tonna bolǵan, bul 2020 jylmen salystyrǵanda 1,4 paiyzǵa az.
Atmosferaǵa taraǵan ziian zattardyń jartysy Pavlodar (736 myń tonna) jáne Qaraǵandy (569 myń tonna) oblystaryna tiesili. Sondai-aq, Atyraý, Qostanai jáne Aqtóbe oblystarynda 100 myń tonnadan asa ziian shyǵaryndy tirkelgen.
Atmosferaǵa taraǵan 2,4 million tonna lastaýshy zattardyń 2,1 million tonnasy tek ónerkásip salasynan. Shyǵaryndynyń eń kóp kólemi jylý jáne elektrmen jabdyqtaý segmentinde - 945,2 myń tonna. 728,1 myń tonnasy óńdeý ónerkásibine tiesili. Sýmen qamtamasyz etý, sondai-aq qaldyqtardy jinaý, óńdeý jáne kádege jaratýda 47,8 myń tonna shyǵaryndy tirkelgen.
Ónerkásipten basqa kólik jáne qoima sharýashylyǵy salasyndaǵy kásiporyndardan da aýaǵa ziian zattar shyǵady - 114 myń tonna.
2021 jyly atmosferaǵa shyqqan gaz tárizdi jáne suiyq lastaýshy zattardyń úlesi 79,6 paiyz nemese 1,9 million tonna boldy. Onyń ishinde kúkirt dioksidi - 835,4 myń tonna, kómirtegi totyǵy - 473,2 myń tonna, azot oksidi - 322 myń tonna, kómirsýtek - 133,2 myń tonna.
