Halyqaralyq aýyr atletika federatsiiasynyń (IWF) prezidenti Tomash Aian AFP agenttigine bergen suhbatynda Qazaqstannyń diskvalifikatsiiaǵa ushyraitynyn málimdedi, - dep habarlaidy Vesti.kz tilshisi.
Buǵan 2008 jáne 2012 jyldardaǵy Olimpiadalarda sportshylardan alynǵan qan synamalarynyń iri tekserisinen kóp adamnyń aǵzasynda tyiym salynǵan zattardyń anyqtalýy sebep bolyp otyr eken.
"Rio Oiyndarynan keiin bul elderdiń uiymǵa múshelik etýin toqtatamyz. Buǵan kepil bola alamyn. Bul elder - Resei, Qazaqstan jáne Belarýs", - dedi Aian.
Onyń aitýynsha, endigide sońǵy eki Olimpiadada úsh sportshysynan doping tabylǵan jaǵdaida bir jylǵa diskvalifikatsiiaǵa ushyraityn bolypty. Bastapqyda IWF Qazaqstan men Belarýsti Rio Oiyndaryna jibergisi kelmegen, biraq HOK ótken Olimpiadalardaǵy barlyq aldyńǵy doping-synamalardy tekserip úlgermegendikten tyiym sala almaǵan edi.
"Qaita jasalyp jatqan saraptamalar aiaqtalǵan joq. Qosymsha málimet kútip otyrmyz, músheligi toqtatylatyn taǵy birneshe el bolady dep oilap otyrmyn. Biz aýyr atletikany sporttyń taza túrine ainaldyrǵymyz keledi jáne onyń bir ǵana joly bar - bizdiń erejelerdi buzatyn elderge tyiym salamyz. Qai eldiń músheligi toqtatylatynyn qyrkúiek aiynyń sońynda jariia etemiz dep oilaimyn.", - dedi Aian.
Aýyr atletika federatsiiasynyń basshysy Tokiodaǵy Olimpiadada bul sport túriniń abyroiy basqa bolady dep esepteidi. "Biz tolyqtai dopingten qutylamyz dep aita almaimyn. Biraq men senemin, 2020 jylǵa deiin jaǵdai ózgeredi", - dep málimdedi Aian.
