Qazaqstanǵa paratsetamoldyń 700 myń qaptamasy jetkizildi. Bul týraly Densaýlyq saqtaý ministri Aleksei Tsoi aitty, – dep habarlaidy QazAqparat.
«Meditsinalyq uiymdarǵa naýqastardy KVI-den emdeý úshin antibiotiktiń 16 túri úzilissiz jetkizilýde. Sonymen birge kerekti dári-dármekti jedeldetip dárihanalarǵa jetkizý úshin distribiýtorlarmen kelissózder júrgizilip jatyr. Spekýliatsiiaǵa jol bermeý maqsatynda ákimdikter bir adamǵa dári-dármekti shekteýli túrde satý máselesin rettep jatyr. Osy aptanyń sońyna deiin bólshek saýda jelilerine virýsqa qarsy preparattardyń 70 myń qaptamasy jetkiziledi. Ystyq túsiretin dáriler, máselen paratsetomol Qazaqstan naryǵyna túse bastady. Qazirgi tańda bul preparattyń naryqqa ártúrli óndirýshilerden 700 myń qaptamasy jetkizildi. Aldaǵy eki aptada paratsetamoldyń taǵy 800 myń qaptamasyn jetkizý kózdelgen», - dedi Aleksei Tsoi búgin OKQ-da ótken baspasóz máslihatynda.
Eske sala ketsek búgin QR Premer-Ministri Asqar Maminniń tóraǵalyǵymen ótken Memlekettik komissiia otyrysynda QR Prezidenti Qasym-Jomart Toqaevtyń tapsyrmasyna sáikes Qazaqstandaǵy epidemiologiialyq ahýaldy turaqtandyrý sharalary qaralǵan bolatyn. Memlekettik komissiianyń sheshimimen 5 shildeden bastap elimizde 14 kúnge qatań shekteý sharalary engiziletin boldy.
