Qazaqstan Respýblikasynyń Eńbek jáne halyqty áleýmettik qorǵaý ministrligi aǵymdaǵy jyldyń II (ekinshi) toqsanynda ataýly áleýmettik kómek (budan ári – AÁK) alýshylarǵa tólemderdi III (úshinshi) toqsanda uzartýdy kózdeitin buiryq ázirledi jáne qabyldady. Sonymen qatar, qujatta múgedektik merzimin 3 aiǵa avtomatty túrde uzartý kózdelgen.
Joǵaryda kórsetilgen sharalar azamattardyń koronavirýstyq infektsiiany juqtyrý qaýpin azaitý maqsatynda memlekettik instantsiialarda adamdardyń jappai jinalýynyń aldyn alýǵa baǵyttalǵan.
Birinshi kezekte AÁK otbasy quramy, turǵylyqty mekenjaiy jáne tabys deńgeii ózgermegen otbasylarǵa taǵaiyndalady. Áleýmettik kómekti qaita taǵaiyndaý úshin derekter naqtylanatyn bolady, atap aitqanda turǵylyqty jeri boiynsha tirkeý (tirkelý), jyljymaityn múliktiń, kóliktiń bolýy, kirister jáne basqalary. Eger de otbasy quramy ózgermegen jaǵdaida, ótinishter qolda bar derekter negizinde qalyptastyrlady. Barlyq aqparat, sondai-aq habarlamalar elektrondyq poshta nemese messendjerler arqyly jiberiledi.
II toqsanda ataýly áleýmettik kómek almaǵan azamattarǵa AÁK-ti alǵash ret taǵaiyndaý úshin egov.kz portaly arqyly ótinish jiberý qajet. Budan ári jumyspen qamtý ortalyqtarynyń qyzmetkerleri qujattardy memlekettik organdardyń aqparattyq bazalarynda tekseredi jáne nátijesi týraly elektrondyq poshta nemese messendjerler arqyly habarlaityn bolady.
Bul rette ýchaskelik komissiialar kóshpeli tekserýler júrgizbeidi. Barlyq qajetti qujattar azamattardan elektrondyq poshta arqyly nemese messendjerler arqyly suratylady.
2020 jylǵy II toqsandaǵy jiyntyq kiristi esepteý kezinde táýelsiz jeke jumyskerlerdiń tótenshe jaǵdai rejimimen qoiylǵan shekteýlerine bailanysty tabysynan airylǵan jaǵdaida biryńǵai jiyntyq tólemdi jáne áleýmettik tólemdi tóleýge bailanysty ailyq eseptik kórsetkishtiń 25 eselengen mólsherindegi kirisi eskerilmeidi.
Budan basqa, azyq-túlik jáne turmystyq jinaqtardy satyp alýǵa jáne TJ kezeńinde kommýnaldyq qyzmetterdi tóleýge jumsalǵan shyǵyndardy óteýge bólingen aqshalai qarajattyń mólsheri esepke alynbaidy.
Múgedektik, jalpy jáne kásiptik eńbek etý qabiletinen aiyrylý dárejesi, sondai-aq jeke ońaltý baǵdarlamasy, budan burynǵy siiaqty avtomatty túrde uzartylady. Bul shara qaita kýálandyrý merzimi shekteý sharalary kezeńine kelgen azamattarǵa qatysty bolady.
Múgedektikti alǵash ret belgilegen jaǵdaida egov.kz portalynda «Elektrondyq ótinishter» bóliminde qujattardyń skanerlengen kóshirmelerimen qosa ótinim berý qajet.
16 jáne 18 jasqa tolǵan múgedek balalarǵa qatysty syrttai qaita kýálandyrý qarastyrylǵan. Olarǵa múgedektik qolda bar qujattar negizinde jáne aldyńǵy saýalnamaǵa sáikes múgedektik dárejesin eskere otyryp belgilenedi.
Meditsinalyq-áleýmettik saraptama bóliminiń saraptamalyq qorytyndysyna shaǵym túsken jaǵdaida saraptama MÁS aktisi men usynylǵan qujattar negizinde syrttai júrgiziledi.
Aita keteiik, I toqsanda ataýly áleýmettik kómek alýshylarǵa sol kezdegi tótenshe jaǵdai rejiminiń qoldanylýyna bailanysty tólemder taǵaiyndaý merzimi II toqsanǵa uzartylǵan bolatyn. II toqsanda 561 myń qazaqstandyq AÁK-ti memlekettik instantsiialarǵa júginbei, avtomatty túrde aldy.
Sol ýaqytta meditsinalyq-áleýmettik saraptama júrgizý syrttai elektrondyq ótinish negizinde retteldi. Karantin engizilgen sátten bastap 5 myńǵa jýyq syrttai kýálandyrý júrgizildi.
Osy máseleler boiynsha konsýltatsiialardy call-ortalyqtan 1411 nómiri boiynsha alýǵa bolady.
