Foto: TJM
Túrkiiadan Qazaqstannyń 42 azamaty jáne Qyrǵyzstannyń 22 azamaty evakýatsiialandy, - dep habarlaidy "Ult aqparat" Syrtqy ister ministrliginiń baspasóz qyzmetine silteme jasap.
"Qazaqstan Prezidenti Qasym-Jomart Toqaevtyń tapsyrmasymen Túrkiiadaǵy jer silkinisinen zardap shekkenderge qosymsha kómek kórsetý úshin QR Tótenshe jaǵdailar ministrliginiń ekinshi eshelony 8 aqpanda qajetti izdestirý-qutqarý qural-jabdyqtary tielgen ushaqpen Gaziantep qalasyna kelip jetti.
Qazaqstannyń Túrkiiadaǵy elshiliginiń uiymdastyrýymen keri reispen IL-76 ushaǵymen 64 adam - Qazaqstannyń 42 azamaty jáne Qyrǵyzstannyń 22 azamaty Astanaǵa qaitaryldy. Elge oralǵan azamattar Gaziantep, Mersin, Kahramanmarash, Diarbakyr, Shanlyýrfa jáne Eliazyk provintsiialarynan kelgen", - delingen habarlamada.
Eske salaiyq, buǵan deiin Túrkiiadan 16 qazaqstandyq pen eki Qyrǵyzstan azamaty evakýatsiialanǵan bolatyn. Olar 8 aqpanǵa qaraǵan túni QR Tótenshe jaǵdailar ministrligi bortymen kelgen.
